Орусиянын армиясы 22-январга караган түнү Украинанын Сумы жана Николаев облустарына дрондор менен абадан чабуул койду. Украинанын Өзгөчө кырдаалдар кызматы маалымдагандай, Сумыда үч киши жабыркады. Ал эми Николаевде эки тургун жараат алганын облус администрациясынын башчысы Виталий Ким билдирди.
Сумыда чабуулдун айынан эки кабатуу менчик үйдө өрт тутанган. Тиешелүү кызматтар тилсиз жоону убагында өчүрүштү. Андан башка дагы 13 үй талкаланганы маалым болду.
Ал эми Николаевде "Шахед" дронунун сыныктары түшкөн алты жерде өрт тутанды. Алты кабат үй жабыркап, ичиндеги 200дөй адам коопсуз жайга көчүрүлдү. Жардыруунун толкунунан бир нече үйдүн, оорукананын, административдик имараттардын терезелери күбүлүп түшкөн.
22-январга караган түнү бул эки облустан тышкары Киев, Чернигов, Харьков, Полтава жана Днепропетровск облустарында чабуул тууралуу эскертүү сиреналары жаңырды.
Орусиянын Коргоо министрлиги көптөгөн фото жана видео далилдерге карабастан Украинадагы аскердик жайларды гана бутага аларын билдирип келет. Ал эми карапайым тургундар жашаган аймактарга жасалган соккуларды же комментарийлебейт же украин армиясынын абадан коргонуу системасына шылтап жүрөт.
АКШнын президенти Дональд Трамп эгер Орусия президенти Владимир Путин Украинадагы согушту токтотуу боюнча сүйлөшүүдөн баш тартса, анын администрациясы Орусияга каршы санкцияларды киргизе турганын 21-январда айтты. Бул тууралуу Reuters маалымат агенттигине шилтеме кылып "Свобода" радиосу жазды.
Трамп администрациясы Украинага курал жөнөтүү маселесин караштырып жатканын, Европа Биримдиги Киевге көбүрөөк жардам бериши зарылдыгын белгилеген.
"Биз Зеленский [Украинанын президенти] менен сүйлөшүп жатабыз, жакын арада биз президент Путин менен сүйлөшөбүз», — деди Трамп.
Трамп президенттик кызматка киришкенден кийин журналисттердин суроосуна жооп берип жатып Орусиянын президенти Владимир Путин Украинадагы согушту токтотуу боюнча келишимге жетишүүгө аракет кылбай, “Орусияны жок кылып жатканын” билдирген. Ал "Орусия чоң кыйынчылыкка кабылат" деп айткан.
Батыштын комментаторлору муну Дональд Трамптын Путиндин дарегине айткан катуу сын-пикирлеринин бири деп аташты.
АКШнын 47-президенти Дональд Трамп жана вице-президент Жей Ди Вэнс 20-январда салтанаттуу ант берип, кызматка расмий киришти.
Украинада аскердик кызматка шалаакы мамиле жасаган деген шек менен бир полковник, эки генерал кармалды. Бул тууралуу Башкы прокурордун кеңсеси билдирди.
Тергөөнүн версиясына караганда, алардын айынан украин чек арасын коргоо иштери камсыздалбай, 2024-жылдын май айында Харьков районунун Липецк айылдык аймагын орус күчтөрү басып алган.
415-бригаданын полковнигине аскердик кызматка шалаакы мамиле жасаган жана согуш талаасынан өзүм билемдик кылып кетип калган деген айып тагылууда. 125-бригаданын командири болуп турган генерал-лейтенантка жана "Харьков" ыкчам-тактикалык тобунун мурдагы командири, генералга аскердик кызматка шаалакы мамиле жасаган деген кине тагылып жатат.
"Украинская правда" кеп полковник Илья Лапин, генерал-лейтенант Артур Горбенко жана генерал Юрий Галушкин тууралуу болуп жатканын жазган.
Мамлекеттик тергөө бюросунун маалыматында, Илья Лапин бир катар айылдарда коргонуу тактикасын уюштуруп, миналарга каршы күрөшүү жолдорун аныктап, курал-жабдыктарды сактоо жайларын даярдаган эмес. Артур Горбенко орус армиясынын мүмкүнчүлүктөрүн туура баалабай, "душман тараптан жаралган коркунучтарга" адекваттуу реакция жасабай койгон. Андан тышкары чабуул болору тууралуу маалыматтарга ээ болуп туруп, аны кол алдындагыларга жеткирген эмес.
Кармалгандар Киевге жеткирилди. Күнөөлөрү далилденсе алар 10 жылга чейин эркинен ажыратылышы мүмкүн.
Орусияга караштуу Татарстан жумуриятынын борбор калаасы Казань 20-январдын таңында дрон чабуулуна кабылды. Жергиликтүү бийлик чабуулду Украинадан көрүп, дрондор өндүрүш ишканасын бутага алуу аракетин көргөнүн билдирди. Кайсы ишкана экени такталган жок.
Расмий маалыматка караганда, дрондор абадан атып түшүрүлгөн. Жергиликтүү тургундар жана Телеграм-каналдар украиналык дрондор Горбунов атындагы Казань авиациялык заводуна чабуул койгонун жазышты. Бул ракета алып жүрүүчү Ту-160 стратегиялык учактар менен бомбалоочу учактарды өндүргөн жана оңдоп-түздөгөн ири ишкана. Аталган учактарды орус армиясы Украинадагы согушта колдонуп келет.
Айрым маалыматтарга караганда, дрондордун бири заводдун аймагындагы бош резервуарга тийген. Казань аэропортунда авикаттамдар убактылуу токтоду. Мындай чектөөлөр Нижнекамск жана Ижевск аэропортторунда дагы киргизилди.
Орусиянын Коргоо министрлиги 20-январдын таңында тараткан билдирүүсүндө бир нече аймакта жалпы 31 дрондун мизи кайтарылганын кабарлады.
Калуга облусунун губернатору Владислав Шашпа ишканалардын биринин аймагына дрон сыныгы түшкөнүн жазды. Анын сөзүнө караганда, чабуулдан улам тутанган өрт убагында өчүрүлдү. Жабыркагандар катталган жок. Шашпа кеп кайсы ишкана тууралуу болуп жатканын тактаган жок.
Москва Украинага 2022-жылы 24-февралда согуш ачканы, Орусиянын аймактары утур-утур дрон чабуулдарына кабылып келет. Кремль муну Киевден көрөт. Украин бийлиги адатта Орусиянын аймагында болгон окуяларга комментарий бербейт.