14-март күнү Орусия Украинаны аткылаганда алты адам мерт кетип, ондогон кишилер жаракат алды. Орусия жалпы 430 дрон жана түрдүү типтеги 68 ракета менен чабуул койгонун украин президенти Владимир Зеленский билдирди.
"Тилекке каршы үйлөр, мектептер жана жарандык мекемелер бутага алынды", - деп жазды Зеленский Телеграм каналына.
Киевдин аскердик администрация башчысы Николай Калашник аймактарда беш адам мерт кеткенин жана 15 адам жаракат алганын билдирди.
"Үчөө оор абалда, экөө операцияда", - деп кошумчалады ал.
Орусиянын чабуулунан Запорожьеде дагы бир адам мерт кеткени кабарланды, дагы кеминде беш аймак орус дрондорунун бутасына алынган. Ондогон адамдар жаракат алды, арасында жети өспүрүм бар.
Орусия тарап соккулар тууралуу комментарий берген жок, бирок Телеграм каналдар аймактагы жардыруулар жана түтүн тартылган тасмаларды чыгарышты.
Орусиянын соккусу АКШ Иранга каршы согуш шартында орус мунайына киргизилген санкцияларды дүйнөлүк энергетика базарын турукташтыруу үчүн убактылуу алуу чечиминен кийин болду. Киев бул кадам Кремлдин фондун болжолдуу 10 млрд долларга толтурат деп билдирди.
Дүйнө коомчулугунун көңүлү Жакынкы Чыгыштагы күчөп бараткан жаңжалга бурулгандыктан, Орусиянын Украинага каршы согушун токтотуу боюнча сүйлөшүүлөрдү жүргүзүү аракеттери басаңдап, фронттогу согуш уланып жаткандыктан, сүйлөшүүлөрдүн тагдыры белгисиз бойдон калды.
12-мартта Киев менен Москва Орусия, Украина жана АКШ катышкан үч тараптуу сүйлөшүүлөрдүн акыркы айлампасы кийинкиге жылдырылганын ырасташты, ал эми 13-мартта украин аскерлери ошол күнү фронтто 153 кагылышуу болгонун билдиришти.
"Орусия Жакынкы Чыгыштагы согушту Европада, Украинада дагы көп кыйроолорду жаратууга пайдаланууга аракет кылат", - деди Зеленский 14-мартта.
Андан тышкары, Киев Жакынкы Чыгыштагы өнөктөштөрү менен дрондорду кармоо тажрыйбасын бөлүшүүгө аракет кылып жатканда, Тегеран Украина аймагы эми Иран күчтөрү үчүн "мыйзамдуу бута" деп эсептелиши мүмкүн экенин эскертти.
Иран көптөн бери Орусиянын өнөктөшү болуп келген жана Москванын Украинага каршы аскердик операциялары үчүн ага аскердик жабдууларды жана технологияларды жеткирип келген. Киев 2022-жылдан бери Орусиянын өлкөгө жасаган чабуулдарында кеминде 57 000 "Шахед" дрондору колдонулганын буга чейин билдирген.
15-мартка караган түнү Украинанын армиясы Орусиянын Белгород облусуна ракета менен сокку урганын аймактын губернатору Вячеслав Гладков билдирди. Анын айтымында, соккудан улам энергетикалык инфраструктурага зыян келтирилди, Белгород шаары менен Белгород районунда жарык, суу, жылуулук берүү үзгүлтүккө учурады, объектилердин биринде өрт чыкты, жабыркагандар жок.
Волгоградда украиналык дрондордун чабуулунан көп кабаттуу үйдүн терезелери күбүлүп калганын, жабыркагандар жок экенин губернатор Андрей Бочаров жазды.
SHOT Телеграм каналы жергиликтүү тургундарга шилтеме берүү менен Волгоград облусу таңкы саат 3төн бери дрондордун жапырт чабуулуна кабылганын, 20дан ашуун аппарат жок кылганын жазды.
Украин дрондорунун чабуулуна Мордовиянын башкалаасы Саранск да кабылганын жергиликтүү бийлик билдирип, жараат алгандар жок экенин кабарлады.
Краснодар крайынын ыкчам штабы украиналык дрондордун чабуулунан Тихорецкинин четиндеги мунай базасында өрт чыкканын кабарлады. Тихорецк районунда учкучсуз учактар жогорку вольттуу чубалгыларга зыян келтиргени маалымдалды.
Акыркы жолу бул мунай базасы 12-мартта аткыланып, бул үчүн жоопкерчиликти Украинанын Коопсуздук кызматы алган.
Орусиянын Украинага "атайын аскердик операция" деп атаган негизсиз кол салуусуна 2026-жылдын 22-февралында туура төрт жылдын жүзү болот. Бул мезгил аралыгында Украинада миңдеген киши бейажал өлүм тапты, миңдегени майып, качкын болуп, үй-жайсыз калды.
Орус армиясы Украинага күн сайын сокку уруп жататю Москванын согушуна жооп иретинде Украина Орусиянын армиясын каржылоо булагы деп эсептелген мунай заводдорун маал-маалы менен бутага алып келет.
АКШда Орусиянын президентинин атайын өкүлү Кирилл Дмитриев баштаган делегация менен сүйлөшүү өткөнүн Ак үйдүн Украина боюнча атайын чабарманы Стив Уиткофф билдирди. Анын айтымында, жолугушуу 11-мартта Флоридада өттү, анда америкалык делегациянын курамында АКШ президентинин кеңешчиси, күйөө баласы Жаред Кушнер жана федералдык сатып алуулар боюнча комиссар Жош Груенбаум болду.
Груенбаум жыл соңунан бери Орусия менен АКШнын делегацияларынын ортосундагы жолугушууларга катышып келет, бирок анын сүйлөшүүлөрдөгү ролу ачык айтыла элек.
Уиткофф бул жолку жолугушуу тууралуу "командалар ар кандай темаларды талкуулап, байланышта болууну макулдашышты" деп, ал эми Дмитриев сүйлөшүүлөрдү "жемиштүү" деп аташты. Мындан башка кеңири маалымат айтылган жок.
Украинада тынчтык орнотуу планын Кошмо Штаттардын президенти Дональд Трамп сунуштап, орус, украин жана америкалык өкүлдөрдүн жолугушуулары өткөрүлө баштаган.
Кезектеги сүйлөшүүлөр АКШ Израил менен биргеликте Иранга каршы аскердик операция жүргүзүп, Тегеран каршылыгын көрсөтүп, ошонун айынан Жакынкы Чыгыштагы мунай кризиси жаралган чакта өттү.
Соккуларга жооп катары Тегеран Ормуз кысыгын де-факто жаап салды, бул дүйнө жүзү боюнча күйүүчү майдын баасынын бир топ жогорулашына алып келди. Аталган кысык аркылуу мунайдын болжол менен 20 пайызы дүйнөлүк рынокко жөнөтүлөт. Түзүлгөн жагдайдан улам АКШ Индияга деңиздеги танкерлерде сакталган орус мунайын сатып алууга убактылуу уруксат берди. Вашингтон эгер мунай базарында туруксуздук жаралса орус мунайына карата санкцияларын алып салышы же жумшартышы мүмкүн деген да маалыматтар тарап жатат. Санкциялар орус бийлиги Украинага каршы согуш ачканы үчүн, анын согуштук мүмкүнчүлүгүн алсыратуу максатында жарыяланган.
Орус аскерлери Украинанын аймагын аткылоону улантып, 11-мартта Донецк облусундагы Краматорск шаарына төрт авиабомба менен чабуул коюлганда бир дүрмөт турак жайга тийди. Калаанын аскердик администрациясынын башчысы Александр Гончаренко маалымдагандай, 50 чакты объект зыян тартты, бир киши жабыркады.
Херсондо 91 жаштагы аял 9-мартта орус армиясынын аткылоосунан алган жарааттардан ооруканада көз жумганын облус башчысы Александр Прокудин маалымдады.
Анын жазганына караганда, акыркы 24 саатта бир киши каза тапты, 12 киши, арасында бир бала жарадар болду, 42 айыл-кыштак соккуга кабылды.
Харьковдо жарандык өнөр жай ишканасына урулган соккудан эки киши каза тапты, дагы экөө жарадар болду. Бул тууралуу бүгүн эртең менен шаар бийлиги билдирди. Сокку урулган жерде өрт тутанды.
Сумы облусунун Глухово калаасында 10-мартта бир кишинин өмүрү кыйылды, үчөө жабыркады. Жергиликтүү бийликтин башчысы Олег Григоров кийин алардын бири ооруканада үзүлгөнүн маалымдады.
Далилдерге карабай, Орусия аскердик гана жайларды бутага алганын айтып келет.