Орусия аскерлери бейшемби, 16-июлга караган түнү Украинанын аймагына чабуулдарын улантты: Киев баллистикалык ракета, Харьков учкучсуз учак менен аткыланды.
Борбор калаа Киевге баллистикалык ракеталар менен чабуул жасалып, бир нече жерде катуу жарылуу болду. Бул тууралуу "РБК-Украина" басылмасы жазды.
Өлкөнүн Аскер-аба күчтөрүнүн маалыматы боюнча, сокку кеминде төрт ракета менен жасалды.
Киевдин мэри Виталий Кличконун айтымында, Дарницкий районунда ракетанын калдыктары имараттын аймагына түшүп, өрт чыккан. Святошино районунда да өрт чыккан.
Баштапкы маалымат боюнча эки киши каза болуп, дагы алты киши жарадар болгону айтылды.
16-июлга караган түнү Орусиянын Куралдуу күчтөрү Харьковго да учкучсуз учактар менен сокку урушту. Шаардын мэри Игорь Тереховдун айтымында, Киев жана Шевченко райондору жабыркады. Шевченко районундагы сейил бактардын бирине сокку урулганда кинотеатрдын имараты, унаа токтотуучу жай жана теннис корту зыянга учураганы маалымдалды.
Украинанын Одесса шаарында Орусиянын соккусунан үч адам каза таап, дагы үчөө жараат алганын жергиликтүү администрациянын башчысы Сергей Лысак 15-июлда билдирди. Жабыркагандар орточо оор абалда ооруканага жеткирилгени маалымдалды.
Лысактын айтымында, 14-июлдун кечинде орус аскерлери шаарга бир нече жолу сокку урду.
Украинанын Өзгөчө кырдаалдар боюнча мамлекеттик кызматы билдиргендей, соккулардын бири жарандык инфраструктурага тийди. Бир ишкананын кампасы талкаланды. Ал жерде өрт чыгып, жүк ташуучу эки унаа жабыркады.
Орусиянын Коргоо министрлиги 15-июлга караган түнү Украинанын Одесса облусунун "Одесса" жана "Черноморск" портторун бутага алганын, ал жерде инфраструктура, күйүүчү май куюлган резервуарлар жана учкучсуз учак жасалуучу цех жабыркаганын маалымдады. Жалпысынан эки ракета жана 122 учкучсуз учак колдонулганы айтылды.
Чернигов облусунун бийлиги да Орусиянын чабуулуна кабылганын кабарлады. Ал жерде бир адам каза болуп, турак үй жана унаа жабыркаган, ишкананын аймагында өрт чыккан.
Ошондой эле Днепропетровск, Житомир, Николаев жана Сумы облустары да бутага алынганы белгилүү болду.
15-июлга караган түнү орус аскерлери Украинанын Сумы облусундагы конуштардын бирине кассеталык ок-дары менен сокку урганын жергиликтүү администрациянын башчысы Сергей Кривошеенко билдирди.
Анын айтымында, чабуулдан жалпы жети киши жараат алды. Жабыркагандардын арасында катуу стресске кабылган 11 жаштагы бала да бар. Шаршемби күнү дарыгерлер жараат алгандардын экөө — 30 жаштагы эркек жана 59 жаштагы аял оор абалда экенин маалымдашты.
«Көчөлөрдө жарылбай калган ок-дарылар калып калышы ыктымал, этият болуңуздар», — деп эскертти Кривошеенко.
Украинанын Харьков облусуна караштуу Изюм районунда 15-июлда Орусиянын чабуулунан сокку урулган жерлерде өрт тутанып, адамдар жараат алганын жергиликтүү мамлекеттик администрация билдирди. Маалыматка караганда, Орусиянын Куралдуу күчтөрү чабуулду башкарылуучу авиациялык бомбалар жана Shahed дрондору менен жасаган. Райондук администрациянын Telegram каналындагы кабарларга ылайык, жабыркагандар боюнча маалыматты тактоо иштери уланууда.
"Жарандык объектилер талкаланды, коммуналдык ишканалардын мүлкү, айыл чарба техникасы жана жеке үйлөр жабыркады", — деп айтылат жергиликтүү бийликтин билдирүүсүндө.
Ал эми 5-июлда Харьков облусунун Изюм шаарында Орусиянын соккусунан бир киши набыт болуп, кеминде үч киши жараат алган. Анда май куюучу бекет талкаланып, беш автоунаа жарактан чыккан.