Жапаров: Келерки беш жылда ар бир кыргызстандыктын жашоосун жакшыртууга шарт түзүлөт.
Садыр Жапаров: Соңку 4-5 жылда коңшулар менен мамиле салкындап кеткен, аны оңдоонун үстүнөн иштеп, сапарларды уюштурдук.
Садыр Жапаров ноябрдын башында Глазгодо климаттын өзгөрүүсү боюнча конференцияга барып, өлкөдөгү мөңгүлөрдү талкалаган "абийирсиз" ишканаларга каршы жардам берүүгө эл аралык коомчулукту чакыра турганын айтты.
Президенттик администрациянын ырайым кылуу боюнча комиссиясынын жооптуу катчысынын кармалышы боюнча Жапаровдун жообу:
Ырайым берүү боюнча акча алып атат деген маалымат мага мурда эле түшкөн. Ачык эле айта берейин, Чолпон Жакупова менен жолукканда жарандык берүүдө, ырайым берүүдө коррупция болуп атат деген.
Ошондо ушул жигитти чакырып "түрмөдө байдын балдары отурбайт, карапайым элдин балдары. Алар акыркы коюн сатып акча табууга арагасыз болот" дегем. Ал жигит албайм деген. Анын акча сурап атканы тууралуу маалымат түштү. Биз аны каматтык. Жашырып, жумуштан алып койсок болмок. Бирок андай болбошу керек.
Ушул жумада Улуттук коопсуздук боюнча мамлекеттик комитет (УКМК) пара талап кылууга шек саналып президенттик администрациянын ырайым кылуу боюнча комиссиясынын А.Т.Б. аттуу жооптуу катчысы кармалганын кабарлаган.
Шектүү 18-октябрда ыкчам-иликтөө иш-чараларынын жүрүшүндө 170 миң сом өлчөмүндө акча каражатын алып жаткан жеринен кармалып, Жазык-процесстик кодексинин 98-беренесине ылайык УКМК тергөө камак жайынын убактылуу кармоочу жайына киргизилди. Азыркы учурда тергөө жүрүп жатат.