Борбордук шайлоо комиссиясынын маалыматына караганда, Бишкектеги №26 Ленин бир мандаттуу шайлоо округунан парламент депутатын шайлоо саат 8де башталды. Добушканалар кечки саат 8ге чейин иштейт. Аймакта жалпы 51 добушкана ачылган.
Жекшембиде - 27-майда көчмө добуш берүү болду. БШК анын жыйынтыгын жарыялай элек. 51 шайлоо тилкесинин 20сынан шайлоочуларга көчмө добуш берүү мүмкүндүгүн берүү өтүнүчү менен 97 арыз түшкөн.
Анын:
• улгайгандыгына байланыштуу - 5;
• майыптыгы барлар - 28;
• ооруп жаткандыгына байланыштуу – 41
• Башка категорияларга киргендер -23.
Боршайкомдун маалыматына караганда, шайлоо күнү Улуттук банк, Банктар аралык процессинг борбору, коммерциялык банктар, төлөм системаларын жүргүзүүчү операторлор жана Мамлекеттик каржылык чалгындоо кызматы менен чогуу электрондук төлөмдөргө байкоо жүргүзүлөт.
Мындай көзөмөл 2021-жылы Жогорку Кеңештин жана шаардык кеңештердин депутаттарын шайлоо учурунда да жүргүзүлгөнүн билдирди.
БШК талапкерлерге добуштарды сатып алуу - кылмыш жоопкерчилиги болуп саналарын эскертти. Кыргызстандын мыйзамдары боюнча шайлоочулардын добушун сатып алууга айыпталган адамга 260 миң сом айыппул салынат же 2,5 жылга эркиндигинен ажыратылат.
Ленин округунан Жогорку Кеңештин депутаттыгына 29 талапкер ат салышууда. Алардын үчөө тергөө абагында кармалып турат.
Ленин округунан Жогорку Кеңештин депутаттыгына 29 талапкер ат салышып жатат. Алардын үчөө, тактап айтканда Равшан Жээнбеков, Илгиз Сарылдык уулу жана Акыл Айтпаев тергөө абагында кармалып турат.
Талапкерлердин арасында Эркин Булекбаев, Максат Кунакунов, Данияр Тербишалиев, Өмүрбек Суваналиев, Дамира Ниязалиева, Турсунбай Бакир уулу, Ажыбек Касмалиев, Акин Токталиев, Руслан Бекназаров өңдүү саясатчылар жана коомдук ишмерлер бар.
Аймакта шайлоочулар тизмесинде 125 миңге жакын адам бар. Добушканадан сырткары 83 адам добуш берди.
Бишкектеги бир мандаттуу Ленин шайлоо округунда добуш башталгандан саат 11.00го чейин алты арыз түштү. Бул тууралуу Борбордук шайлоо комиссиясынын төрагасынын орун басары Тынчтык Шайназаров брифингде билдирди. Анын ырасташынча, кайрылуулардын үчөө үгүт иштерине байланыштуу болсо, калганы добуш сатуу тууралуу.
Шайназаровдун айтымында, Ленин райондук милициясы төрт арызды териштирүүдөн баш тартты, ал эми добуш сатып алууга байланыштуу эки кайрылуу текшерилип жатат.