Нарын районунун Жер-Көчкү айылы түптөлгөндөн бери эле таза суу көрө элек. Арыктан суу ичкен бул айылда боор, ичеги оорулары менен элүүдөн ашык киши жашайт. Илдети өтүшүп кетип көз жумгандары да бар.
Курорттук аймак деп саналган Ысык-Көлдө да таза суу маселеси кабыргасынан коюлган. Маселен, Жети-Өгүз районундагы калк жыш отурукташкан Дархан айылынын тургундары таза сууну кошуна айылдан ташып ичишет.
Баткен шаарынын 30 миңдей калкын таза суу менен камсыз кылыш үчүн акыркы 15 жылда эле 100 млн. сомдон ашык каражат сарпталды. Быйыл да жаңы долбоор башталып, 40 млн. сомго жакын каражат сарпталат. Учурда сааты менен суу берилип, кээ бир конуштарда такыр эле ичүүчү суусу жок.
Ош шаар жетекчилигинин калааны үзгүлтүксүз таза суу менен камсыз кылуу планы арабөк калды. Оңунан чыкпай калган "Таза суу" долбоору учурда Каржы полициясы тарабынан текшерилип жатат. Расмий маалыматтарда "Ош шаарынын калкы таза суу менен толук камсыз" деп айтылганы менен, жаңы конуштун тургундары арыктагы суудан ичүүгө мажбур.
Кыргызстанда сугат суунун тартыштыгы жана аны сарамжалсыз колдонуу айыл чарба азыктарынын түшүмдүүлүгүн арттырууга жолтоо болуп жаткан кези. Бул багытта эл аралык уюмдар жана өкмөт фермерлер жана дыйкандар арасында сууну максаттуу пайдалануу технологияларын кеңири жайылта баштады. Жалал-Абадда акыркы жылдары тамчылатып сугаруу системасынын алкагында суу жетпеген аймактар өздөштүрүлүп жатат.
Кыргызстандагы сугат аянттары үчүн колдонулуучу ири суу сактагычтардын бири - Киров суу сактагычы. Адистердин маалыматына караганда, быйыл суу былтыркы жылдын ушул мезгилине салыштырмалуу 180 миллион метр кубга аз топтолду. Бул сугат суунун тартыштыгын жаратпайбы? Дегеле Киров суу сактагычындагы бүгүнкү абал кандай?
