Айсулуу Тыныбекова: Акыркы бир айда жакшы даярдана алган эмесмин. Дүйнөлүк чемпионатта уялганыман, өжөрлүк менен эле жеңип чыктым. Биринчи мелдеш кыйын болду. Жандүйнөм, булчуңдарым ооруп турган, батыраак бүтсө экен деп жаттым. Режим кармабагандыктан салмагым да түшүп жатты. Бир ай спорт режиминен чыгып кетсең кыйын экен. Жаңылыштык, коркунучтук болгон жок. Адам ичинен өзүнө ишенсе баарына жетет, ишеним болбосо күчтүү болсо да жеңе албайт.
Мындан кийин машыга берем, бирок жандүйнөнүн тынчтыгын каалап турам. Алдыдагы Олимпиадага даярданышым керек.
Айпери Медет кызы: Дүйнө чемпионатына алтын медал алам деп баргам. Спорт деген спорт экен. Коло алдым. Акыркы мелдеште эстон кыз менен күрөштүм. Утуп келе жатып акыркы 30 секундда утулуп калдым. Машыктыруучуларга рахмат, буюрса алдыдагы беттеште сиздерди сүйүндүрөм деген үмүттөмүн.
Жогорку Кеңештин депутаты Байгазы Кенжебаев: Олимпиададан кийин Дүйнө чемпионатына ишенимдүү бардык.
Күрөш федерациясына бир заманбап зал салып койсо жакшы болмок. Биз ушул маселени парламентте байма-бай көтөрүп келебиз. Экономикага байланыштуу ал ишке ашпай келет. 1-1,5 миллион доллардык зал болсо күрөштүн үч түрүнөн машыккандарга жакшы болмок. Азыр эми масса да көбөйө баштады. Зал сөзсүз керек.
Алибек Ташматов, Спорттун олимпиадалык түрлөрү боюнча дирекциянын жетекчисинин орун басары: Биз бир нече жолу сунуштаганбыз. Өкмөт колдосо, жер маселесин чечип берсе, жаңы спорт аренасын курганга инвесторлор даяр турат. Бирөө эле эмес, эки-үчөө даяр турат. Сырттан келген инвесторлор да бар. Жер маселесин эле чечип берсе жакшы болот эле.