Башаламандык уюштурууга шектелип, жапырт кармалгандардын экөө - Атай Бейшенбек жана Акыл Айтбаевдин бөгөт чарасы бүгүн, 25-октябрда каралышы күтүлүүдө. Бул тууралуу "Кылым шамы" укук коргоо уюмунун негиздөөчүсү Азиза Абдурасулова "Азаттыкка" билдирди.
Атай Бейшенбек 23-октябрда, Акыл Айтбаев 24-октябрда кармалган.
Массалык башаламандык уюштурууга шектелип, жапырт кармалгандардын бири Талант Эшалиевдин бөгөт чарасын Биринчи май райондук соту сырттан карап, эки айга үй камагына алды. Активист өзү Бишкектеги ооруканалардын биринде экени кабарланды. Бул тууралуу анын адвокаты Эркин Сооданбеков "Азаттыкка" билдирди.
Соттун чечими менен Бектур Асанов да 20-декабрга чейин камакта калды.
Бишкектин Биринчи май райондук соту ушу тушта саясатчы Бектур Асанов менен Талант Эшалиев аттуу жарандын бөгөт чарасын карап жатат. Аларга азырынча чечим чыга элек.