Укук коргоочу, активист, оппозициялык “Кыргызстан Бириккен Демократиялык Кыймылы” уюмунун мүчөсү Рита Карасартова жана саясатчы, "Туран" саясий партиясынын төрагасы Жеңиш Молдокматов да 20-декабрга чейин камалды.
Молдокматов коюлган айыптарды "жалаа" деп атады. Рита Карасартова да ушундай эле пикирин айтты.
Конституциялык палатанын мурдагы судьясы, оппозициялык “Кыргызстан Бириккен Демократиялык Кыймылы” уюмунун мүчөсү Клара Сооронкулова да соттун чечими менен 20-декабрга чейин камакта калды.
Ал милиция кызматкерлеринин коштоосунда сот залынан чыгып баратып, журналисттердин чечим тууралуу суроосуна "коюлган айыптар президенттик администрациянын фантазиясы, оорулуу фантазия" деп жооп берди.
Кыргызстанда башаламандык уюштурууга шек саналып, жапырт кармалган саясатчылардын жана активисттердин баары эки айга камакка алынды. Мындай чечимди 24-октябрда жана 25-октябрга караган түнү Бишкектин Биринчи май райондук соту чыгарды.
Ага ылайык, кармалгандар Жаза аткаруу кызматынын 21-мекемесинде же СИЗО-1 деген аталыш менен жалпыга маалым болгон Бишкектеги №1 тергөө абагында 20-декабрга чейин камакта болот. Арасында саясатчы Азимбек Бекназаровдун камактагы мөөнөтү 23-декабрга чейин деп белгиленди.
Жалпысынан 20дай кишинин бөгөт чарасы аныкталып, чечим чыкты. Таңкы саат 4төн өткөнүнө карабай сот ишин улантууда.
Соттун чечими менен Кеңешбек Дүйшөбаев жана Кубанычбек Кадыров да 20-декабрга чейин камакта калды.