Бишкектин Биринчи май райондук сотунун 25-октябрга караган түнү саат 02:30да чыгарган чечими менен жапырт башаламандык уюштурууга аракет кылган деген кине менен кармалгандардын бири Гүлнара Журабаева да 20-декабрга чейин камакта калтырылды.
Жапырт башаламандык уюштурууга шек саналып кармалган жарандык активист Эрлан Бекчоро уулу эки айга камалды. Анын бөгөт чарасы 25-октябрга караган түнү Бишкектин Биринчи май райондук сотунда каралды.
Ушундай эле чечим активисттер Перизат Суранова менен Улукбек Маматаевге да чыгарылды.
Алар Жаза аткаруу кызматынын 21-мекемесинде же СИЗО-1 деген аталыш менен жалпыга маалым болгон Бишкектеги №1 тергөө абагында 20-декабрга чейин камакта болору кабарланды.
Жогорку Кеңештин V чакырылышынын депутаты, "Ата Мекен" партиясынын төрайымы Асия Сасыкбаева 20-декабрга чейин камалды. Анын баш коргоо чарасы Бишкектин Биринчи май райондук сотунда 24-октябрда каралды.
Сасыкбаева "массалык башаламандыктарды уюштурууга даярданган" деп шек саналууда.
"Массалык башаламандык уюштурууга даярдык көргөн" деп шек саналган саясатчы Равшан Жээнбеков 20-декабрга чейин камакка алынды. Анын бөгөт чарасы 24-октябрда Бишкектин Биринчи май райондук сотунда каралды.
