Азимбек Бекназаров 23-декабрга чейин камакка алынды
24-октябрдын кечинде Бишкектин Биринчи май райондук сотунда анын бөгөт чарасы каралып, эки айга камакка алуу боюнча өкүм чыкты.
Айданбек Акматов менен Али Шабдан 20-декабрга чейин камакка алынды
24-октябрда Бишкектин Биринчи май райондук сотунда журналист, саясат талдоочу Айданбек Акматов менен жарандык активист Али Шабдандын бөгөт чарасы өз-өзүнчө каралып, экөөнү тең 20-декабрга чейин камакка алуу өкүмү чыкты.
23-октябрда кармалган саясатчылардын жана активисттердин бири Чыңгыз Капаров 20-декабрга чейин камакта калтырылды. Мындай чечимди 24-октябрда Бишкектин Биринчи май райондук соту чыгарды. Анын адвокаты Айдар Сыдыков сот чечимин мыйзамсыз деп атады.
Анын алдында акыйкатчы Атыр Абрахматова Чыңгыз Капаров саламаттыгына байланыштуу камакта отурушу мүмкүн эместигин, Омбудсмендин кеңсесинин кызматкерлери сотко мониторинг жүргүзүп жатканын айткан. Капаров өзү мыйзам бузбаганын билдирген.
Чыңгыз Капаров - "Бүткүл жаштар" партиясынын лидери. 2021-жылы парламенттик шайлоого бир мандаттуу №33 Нарын округунан катышкан.
Президент Садыр Жапаров жапырт камакка алынган саясатчыларга жана активисттерге байланыштуу улуттук "Кабар" агенттигине комментарий берди.
Мамлекет башчы саясатчылар жана активисттер менен буга чейин да сүйлөшкөнүн, Кемпир-Абадга байланыштуу маселени түшүндүрүп бергенине карабай, майнап чыкпаганын билдирди.
"Кыскасы менден кеткен жок. Баары менен диалогго барып атам", - деди президент.
Жапаров камалгандардын ишине кийлигише албай турганын, чекитти сот кое турганын айтты.