23-октябрда кармалган саясатчылардын, жарандык активисттердин айрымдарынын бөгөт чаралары карала баштады. Бишкектин Биринчи май райондук сотуна саясатчы Азимбек Бекназаров, Асия Сасыкбаева, Бектур Асанов, укук коргоочу Рита Карасартова жана жарандык активисттер Али Шабдан менен Чыңгыз Капаров, Атай Бейшенбек, Перизат Суранова, журналист, саясат талдоочу Айданбек Акматов алып келинди.
"Кемпир-Абадды коргоо" комитетинин мүчөсү, активист Тилекмат Кудайберген уулу (Куренов) Кыргызстандан убактылуу чыгып кеткенин өзү "Азаттыкка" кабарлады. Анын айтымында, 23-октябрга караган түнү өлкөдөн чыгып кеткен жана жапырт кармоолор тууралуу уккандан кийин азырынча келбей турууну чечкен. Активист Фейсбуктагы баракчасына Вильнюска жеткенин жазды.
Тилекмат Кудайберген укук коргоо кызматкерлерине видеокайрылуу жасап, элдин коопсуздугун, мамлекеттин бүтүндүгүн бузуу максатында мыйзамсыз аракеттерге барбоого чакырды.
Ички иштер министрлиги Кылмыш жаза кодексинин 36-278-беренеси (“Массалык башаламандыктарды уюштурууга даярдануу”) боюнча козголгон кылмыш ишинин негизинде саясатчылардын жана жарандык активисттердин үй-жайында тинтүү жүргүзүлүп, кармоо иштери жүрүп жатканын маалымдады. Мекеме кимдер кармалганы жана алар кайсы милиция бөлүмүндө экенин тактаган жок.
Акыйкатчы Атыр Абдрахматова 21 киши кармалганын жазып, тизмесин жарыялады. Милиция жапырт иш козгоп, кармаган саясатчылар жана жарандык активисттер кимдер жана эмне менен алек болорун тизмектедик.
Жогорку Кеңештин мурдагы депутаты Канат Исаев 2017-жылы козголгон кылмыш ишинин алкагында убактылуу кармоочу жайга камакка алынган. Бул тууралуу Бишкек шаарынын Биринчи май райондук сотунун басма сөз кызматы 24-октябрда билдирди.
Ага ылайык, Улуттук коопсуздук боюнча мамлекеттик комитеттин (УКМК) тергөөчүсүнүн өтүнүчү менен Исаевдин 2018-жылдын октябрында тандалган эч жакка чыкпоо тууралуу жазуу түрүндөгү бөгөт чарасы өзгөртүлгөн. Анын негизинде Исаев 23-ноябрга чейин УКМКнын убактылуу кармоочу жайына камакка алынды.