HRW Орхан Инанды боюнча билдирүү таратты
Human Rights Watch (HRW) уюмунун сайтында жарыяланган билдирүүдө, “Бишкекте жашаган түрк жана кыргыз жарандыгы бар Орхан Инанды соттун чечими жок уурдалып, Түркияга жеткирилиши эл аралык жана ички укуктарды бузду” деп айтылат.
HRW уюмунун Европа жана Борбор Азия боюнча директору Хью Уильямсон “Орхан Инандынын уурдалышы Анкаранын жалпы эле мыйзамдарды жана эл аралык укук нормаларын тоготпогондугунун белгиси” деди. Уильямсон түрк атайын кызматтары Инандыны жашыруун алып кетишине кыргыз бийлиги каршы чыга алган эмес же уюштурууга катышкан деп божомолдоого болорун белгилеген.
Уюм "Кыргызстан өзүнүн жаранынын укуктарын коргоого чара көрүшү керек, Инанды медициналык кароодон өткөрүлүп, жактоочу берилип анын ишин дыкат териштирүү зарыл" деп билдирет.
Рейхан Инандынын "Азаттык" радиосуна курган маеги.
Бир айдан ашык убакыттан бери дайыны чыкпай жаткан "Сапат" билим берүү мекемелеринин башчысы Орхан Инандынын Түркиядан табылышы бир катар саясатчы, активисттердин сынына кабылды. Анын уурдалышы мамлекеттин көз карандысыздыгына кол салууга барабар деген пикирлер айтылууда.ТИМ түрк элчиси Ахмет Садык Доганды чакырып, нота тапшырды. "Эксперттер талдайт" программасында ушул темада талкуу болду.