Кыргызстандын ИИМи Көк-Таштагы окуядан улам кылмыш ишин козгоду
Кыргызстандын Ички киштер министрлиги (ИИМ) чек арадагы Көк-Таш айылындагы соңку окуяга байланыштуу Кылмыш-жаза кодексинин 402-беренеси ("тынчтыкка каршы кылмыштар") менен иш козгоп, тергөө башталганын билдирди. Ошондой эле жараат алган жарандарга соттук-медициналык экспертиза дайындалды.
"Такталбаган чек ара тилкесинде Тажикстандын жергиликтүү тургундары курулуш иштерин жүргүзүп жатканда Кыргызстандын чек арачылары аны токтотууну талап кылышкан. Ага каршы болгон Тажикстандын жарандары Ош-Исфана унаа жолу менен Исфара-Ворух жолдорунун кесилишине таш коюп, жол тоскон. Эки өлкөнүн бийлик өкүлдөрү курулушту токтотуу, жолду ачуу тууралуу макулдашканы менен саат 19:30 чамасында Көк-Таш айылынын Чыр-Дөбө, Кум-Мазар, Дахма участкаларына, Орто-Боз айылынын Төрт-Көчө участкасына жана Көк-Таш айылындагы ИИМдин 707-аскер бөлүгүнүн имаратына Тажикстандын чек арачылары оор ок атуучу куралдарды колдонуу менен кол салышкан. Натыйжада, жергиликтүү тургундарынын турак жайлары, 707-аскер бөлүгүнүн имараты жабыркап, аскер кызматкерлерине жана 1 жаранга ок тийип, ооруканага жеткирилген", -деп айтылат ИИМ тараткан маалыматта.
Кыргызстан соңку окуяны тажик чек арачыларынын атайын жасаган чагымы деп атаган, тажик тарап болсо Кыргызстанды күнөөлөгөн.
Соңку маалыматка ылайык, кыргыз тараптан 11 адам жараат алды. Саламаттык сактоо министрлиги алардын абалы орточо оор экенин кабарлады.
Тажикстандын "Ховар" маалымат агенттиги жаңжалда эки адам мерт болуп, 10 адам жараат алганын, алардын алтоо аскерлер, төртөө жайкын тургундар экенин жазды.
27-январда Баткенде, кыргыз-тажик чек арасындагы Төрт-Көчө аймагында тажик тургундар жолду бууганга аракет кылып, сүйлөшүүлөрдөн кийин абал жайгарылган. Учурда жабылган жол ачылганы маалым болду.
Баткенде кыргыз-тажик чек ара тилкесиндеги куралдуу кагылышка байланыштуу Кыргызстандын күч түзүмдөрүнүн, тийиштүү мекемелеринин өкүлдөрүнөн турган штаб түзүлдү.
Бул тууралуу Улуттук коопсуздук боюнча мамлекеттик комитеттин (УКМК) төрагасы Камчыбек Ташиев Баткенде журналисттерге билдирди. Анын айтымында, чек арадагы окуяга байланыштуу атайын комиссия дагы түзүлөт.
"Чек арадагы кырдаалдан кийин штаб түзүлгөн. Ага бардык мекеме, күч түзүмдөрдүн өкүлдөрү, жетекчилери бар. Биз саат 11де тажик тарап менен жолугабыз. Анда көп маселелер чечилет. Бул маселелерди президент өзү көзөмөлдөп жатат. Окуяда жарандар, аскер кызматкерлер арасында жоготуу болгон жок, 11 адам жеңил жараат алып ооруканада. Көчүп келген адамдардын бардыгы Өзгөчө кырдаалдар министрлигинин, жергиликтүү бийлигинин көзөмөлүндө. Комиссия түзүлгөн, ал бардыгын териштирип чыгат", - деди Ташиев.
Атайын кызматтын башчысы учурда чек арада абал салыштырмалуу туруктуу экенин кошумчалады.
Улуттук коопсуздук боюнча мамлекеттик комитеттин (УКМК) алдындагы Чек ара кызматы 28-январь, эртең мененки саат 08:00гө карата кыргыз-тажик чек арасында абалды туруктуу деп мүнөздөп жатат.
"Самаркандек, Төрт-Көчө, Көк-Таш, Дахма, Көчө-Бою жана "Головной" аймактарында абал стабилдүү. Түн тынч өттү", - деп айтылат Чек ара кызматынын маалыматында.
27-январда Баткенде, кыргыз-тажик чек арасындагы Төрт-Көчө аймагында тажик тургундар жолду бууганга аракет кылып, сүйлөшүүлөрдөн кийин абал жайгарылган. Бирок бир аздан соң тажик тараптан башка аймакта – Чыр-Дөбөдө ок атылганын Кыргызстандын Чек ара кызматы билдирүүдө.
Кыргызстан муну тажик чек арачыларынын атайын жасалган чагымы деп атоодо. Тажик тарап Кыргызстанды айыптап жатат.
Соңку маалымат боюнча, кыргыз тараптан 11 адам жараат алды. Саламаттык сактоо министрлиги алардын абалы орточо оор экенин кабарлады.
Кыргызстан менен Тажикстан чек арадагы атышууну толук токтотуу тууралуу макулдашканын 28-январда саат 04:10до Кыргызстандын Чек ара кызматы билдирди.
Мекеменин маалыматына караганда, Кыргызстандын Баткен жана Тажикстандын Согд облустарынын жетекчилери баштаган расмий делегациялардын сүйлөшүүсүнүн жыйынтыгында бир катар чечимдер кабыл алынды.
Алар: атышууну толук токтотуу, чек арага тартылган кошумча күчтөрдү жана каражаттарды кайра артка алып кетүү, Баткен – Исфана автожолун толук ачуу, чек ара тилкесинде биргелешкен күзөт уюштуруу.
Чек ара кызматынын маалыматына караганда, эки өлкөнүн делегациялары чыр башталган Төрт-Көчө деген жерге барышты. Ал жерде азыр Баткен-Исфана жолу боюнча кыймыл тоскоолдуксуз жүрүп жатканы маалымдалды.