Аскер Сакыбаева: "Азаттык" ириде элге керек
"Авторитардык багытка кетип бараткан бийликке "Азаттыктын" кереги жок болуп турат. Кемчиликти айтып, туура эмес иштерди, коррупцияны ашкерелеп турган медиа аларга жакпайт. Тескерисинче курулай мактап, көкөлөтүп, чыныгы абалды көрсөтпөгөндөрдү уккусу келип атат деп түшүндүм. Бирок, "Азаттык" элге керек. Эл ичинде болуп аткан жашоо-турмуш, окуялар, кемчиликтерди коом угуп, калыс таразалап турмак. "Азаттыктын" көп болсо Юстиция министрлигиндеги катталуу күбөлүгү алынар, Бишкектеги кеңсеси жабылар. Бирок Прагадагы башкы кеңсеси ачык турат, аны түшүнүү керек. Анын үстүнө социалдык тармактар күч алып турганда, калыс, бейтарап, сын көз караштагы маалыматтарын жайылтууну уланта берет. Бизде сөз эркиндиги жеке эле журналисттерге керек деп ойлогондор бар. Ал карапайым адамдардан тарта жеке ишкер, саясатчысына чейин керек. Мындай эркиндик сот органдарына да тиешелүү болуп, алар бийликтин буйрутмасын, кызматын аткарбастан, чечим кабыл алууда эркин болуусу керек. Алардын бүгүн чыгара турган чечими алардын эркин же эркин эместигинен кабар берет. Ал эми "Азаттыктын" эл үчүн кылган кызматын белгилебей койсок болбос. Жалпыга маалымдоо каражаты катары гана эмес, өз алдынча институт катары да калыптанып калган мекеме болуп калды. Иликтөөлөрдү жүргүзүп, тарыхый, маданий иштерди аткарып, кыз-келиндер, балдар боюнча иштеп келе жатат. Демек, бул медианын өз алдынча институт катары турганынын өзү чоң жеңиш".