Кыргызстандын борбор калаасында 21-апрелден 25-апрелге чейин Азербайжандын маданият күндөрү өтөт.
Анын алкагында Бишкектин тургундары концерттик программалар, спектаклдер, сүрөт көргөзмөлөрү жана адабий, маданий иш-чаралар менен тааныша алат.
Бул тууралуу Маданият, маалымат жана жаштар саясаты министрлиги билдирди.
"Бул иш-чаралар кыргызстандык көрүүчүлөргө азербайжан элинин бай маданияты, салт-санаасы жана искусствосу менен жакындан таанышууга мүмкүнчүлүк түзөт. Маданият күндөрү Кыргызстан менен Азербайжан элдеринин ортосундагы достукту, өз ара түшүнүшүүнү жана маданий байланыштарды мындан ары да тереңдетүүгө багытталган", - деп жазылган маалыматта.
Азербайжандын белгилүү маданият ишмерлеринен турган расмий делегация 20-апрелде Кыргызстанга келди. Аларды “Манас” эл аралык аэропортунан маданият, маалымат жана жаштар саясаты министринин орун басары Тимурлан Ажымалиев жетектеген топ тосуп алды.
Кыргызстан менен Азербайжан Түрк кеңешинин мүчөсү. 2010-жылы түрк элдеринин тили, адабияты, маданияты, тарыхы боюнча илимий изилдөө иштерин координациялап, жергиликтүү булактарга таянып, түрк тилдүүлөрдүн адамзат цивилизациясына кошкон салымын баалоо максатында Түрк академиясы түзүлгөн.(ST)
Шерине