Бул тууралуу Евробиримдиктин тышкы иштер боюнча жогорку өкүлү Кая Каллас 2-апрелде Страсбургда "Эркин Европа/Азаттык" радиосунун журналистинин суроосуна жооп берип жатып билдирди.
Каллас шаркет АКШнын колдоосунан ажыраган уюмдарга жана өлкөлөргө жардам көрсөтүүнү көздөп жатканын, анын ичинде “Эркин Европа/Азаттык” радиосу да бар экенин билдирди.
Ал Евробиримдик үчүн эркин маалымат каражаттары жана ишенимдүү маалыматка алуунун мааниси чоң экенин кошумчалады. АКШ бийлигинин акыркы чечимдерине байланыштуу бир нече уюм жана өлкөлөр Евробиримдиктен жардам сурап кайрылганын, шеркет аларга көмөктөшүү маселесин талкуулашы керектигин айтты. Кая Каллас Украинадагы кырдаал тууралуу суроого да жооп берди:
"Украина үч апта мурун ок атышууну токтотууга макул болду. Бирок биз Орусия тараптан жылышты көргөн жокпуз. Алар оюн ойноп жатышат. Менимче, аларга так мөөнөт берип, позициясы кандай экенин тактап, эгер чындыгындп тынчтыкты каалай турган болсо, аны билдириши керек. Муну украиндер каалап жатканы айдан-ачык", - деди.
Мындан тышкары Орусия менен сүйлөшүүлөрдү Украина жүргүзүшү керектигин, андай жараян Киевсиз ишке ашпай турганын белгиледи. Европанын коопсуздугу тууралуу маселе өнөктөштөр менен чогуу талкууланарын маалымдады.
Бир күн мурун Германия, Франция, Италия, Польша, Испания жана Улуу Британия (G5+ өлкөлөрү) Орусияга санкциялык басымды күчөтүүгө даяр экенин билдирген.
Билдирүүдө бул өлкөлөр Орусияга согуш жүргүзүүгө тоскоол болуу үчүн бардык мүмкүнчүлүктү пайдаланары, басым көрсөтүүгө даяр экени жазылган.
Алар ошондой эле Орусия согушту токтотуп, Украинага келтирген зыяндын чыгымын төлөп бермейинче Батыш өлкөлөрүндөгү орус активдери камактан чыгарылбай турганын кайталаган.
Орусияга карата Европанын санкциялары Москва 2022-жылы Украинага кеңири масштабдуу согуш ачкандан кийин киргизилген. Алардын арасында Орусиядан көмүр, бриллиант, алтын жана алюминий алууга тыюу салынган. (AiA)
Шерине