АКШнын Демократтар партиясынан шайланган сенатор Кори Букер Сенатта Дональд Трампты сындады. Букер тынбай 25 саат 5 мүнөт сүйлөдү. Муну менен Кори Букер Сенатта эң узак сөз сүйлөп, тарыхый рекорд жаратты.
Буга чейин Сенатта узак сөз сүйлөө боюнча рекорд сенатор Стром Термондго таандык болгон. Ал 1957-жылы токтоосуз 24 саат 18 мүнөт АКШдагы айрым штаттардагы сегрегация тууралуу сүйлөгөн.
Букер өз сөзүн дүйшөмбү күнү кечинде саат 19.00дө баштап, чарчаганга чейин улантарын убадалап, "чөнтөгүндө Библия китебиндеги саптардан башка эч нерсе жок" экенин айткан. Бул тууралуу CNN кабарлады. Маалыматка караганда, ал Сенаттагы кайрылуусун кийинки күнү кечинде аяктаган.
"Болгону 71 күндүн ичинде Америка Кошмо Штаттарынын президенти өлкөнүн коопсуздугуна, каржылык туруктуулугуна жана биздин демократиянын негизги принциптерине ушунчалык көп зыян келтирди", - деди Букер.
Нью-Жерси штатынын сенатору Трампты, анын тышкы саясатын, айрыкча Украинага жана европалык өнөктөштөргө карата саясатын сынга алды. Анын популярдуу болуп кетишине демократтардын жоопкерчилиги бар экенин айтты, партиялаштары “аябай катачылыктарды” кетиргенин моюнга алды.
Букердин пикиринде, демократтар өзүнүн "Америка кыялы" жөнүндөгү көз карашын жайылтуунун ордуна, Трамп менен жеке күрөшкө басым жасап койду.
Кори Букер 2028-жылы президенттикке Демократтар партиясынан талапкер катары көрсөтүлүшү мүмкүн.
АКШ Сенатында регламент каралбагандыктан мындай узакка созулган кайрылууулар сейрек эмес.
2013-жылы республикачыл партиянын сенатору Тед Круз 21 саат сүйлөгөн. Сенатор Кори Букер ушунча убакыт сүйлөө үчүн алдын ала даярданганын, тамак-аш жана суусундуктан баш тартканын билдирди. (AiA)
Шерине