Кыргызстанда 2024-жылы 13 жаштан 17 жашка чейинки 353 өспүрүм кыз көз жарган.
Бул тууралуу "Азаттыкка" Акыйкатчы институту билдирди.
Аталган мекеменин соңку баяндамасында, 2023-жылы өлкө аймагында 13 жаштан 17 жашка чейинки 310 кыз көз жарса, 2024-жылы өспүрүм куракта төрөгөндөрдүн саны 353кө жеткени айтылат.
"Башкы прокуратуранын маалыматында, 2024-жылы өлкө боюнча жашы жете электерге нике кыюуга байланыштуу 29 кылмыш иши козголгон. Саламаттык сактоо министрлигинин маалыматы боюнча, былтыр өлкө боюнча 13 жаштан 17 жашка чейин төрөгөн өспүрүмдөрдүн саны 353тү түздү. Алардын эң көбү Чүйдө катталып, 2023-жылы 60 учур катталса, 2024-жылы 113кө жеткен. Эрте никеге туруу кыздардын укуктарына, ден соолугуна жана келечегине олуттуу зыян келтирет. Алардын билим алуусуна тоскоол болуп, өнүгүү мүмкүнчүлүктөрүн чектейт", - деп жазылган баяндамада.
Акыйкатчы институту өспүрүмдөр арасындагы төрөткө эрте никеге туруу адаты себеп болуп жатканын белгилеген. Адатта мындай тагдырга туш болгон кыздар мектепти таштап, окуусун улантышпайт.
Буга байланыштуу акыйкатчы Жамила Жаманбаева Башкы прокуратурага кат жолдогонун билдирди. Анда ал мындай фактылардын көбү тергөөдө кыскарып кетерин белгилеп, Сузакты мисал келтирген. Бул райондо 2024-жылдын тогуз айында эрте никеге турган 23 учур катталса, анын 21и тергөө учурунда кыскартылган.
Саламаттык сактоо жаатындагы адистердин белгилешинче, Кыргызстан өспүрүм курактагы кыздардын төрөт учурундагы өлүмү боюнча Борбор Азияда экинчи орунда турат.
Кыргызстанда эрте куракта никеге турууга мажбурлоо, аны каттоо же ага колдоо көрсөтүү кылмыш катары каралат. Анын негизинде нике кыюуга жол берген тараптар кылмыш жоопкерчилигине тартылып, үч жылдан беш жылга чейин эркинен ажыратылат. (ST/KE)
Шерине