Чаткалдагы кар көчкүнүн алдында калган дагы үч кишинин сөөгү табылганын Өзгөчө кырдаалдар министрлигинин басма сөз кызматы билдирди. Ага чейин дагы бир сөөк табылганы кабарланган. Ошону менен жалпы төрт кишинин сөөгү табылып, дагы экөөнү издөө иштери уланууда.
Башкы-Терек айылынын башчысы Кубанычбек Орозбаевдин “Азаттыкка” сөөгү табылган эки киши ага-ини экенин билдирди.
“Алгач куткаруучулар Кийикбаев Кайырбектин сөөгүн таап, айылга жеткиришкен. Алар көчкү болгон жайга кайра барганча Кийикбаев Канатбектин сөөгүн табышкан. Аны да айылга алып келишип, жерге бергенге даярдык көрүлүп жатат. Алардын көчкүдө аман калган иниси Чынарбек куткаруучулар менен чогуу болуп, кайсы жерде болушканын көрсөтүп жүрөт”, - деди Орозбаев.
18-октябрда Чаткал районунда жайгашкан Ак-Сай тоосунда дайынсыз жоголгон алты жаранды издөө иштерин улантууга тик учак тартылган.
Чаткалда кар көчкү алдында калгандардын биринин сөөгү табылды. Бул тууралуу Өзгөчө кырдаалдар министрлиги 18-октябрда билдирди.
Маалыматка ылайык, сөөк саат 12:45те кар көчкү түшкөн аймактан тик учак менен штаб жайгашкан Кумбел тилкесине алып келинди.
18-октябрда Чаткал районунда жайгашкан Ак-Сай тоосунда дайынсыз жоголгон алты жаранды издөө иштерин улантууга тик учак тартылган.
9-октябрь күнү Каныш-Кыя айылынын тургундары жана бир чет элдик жарандан турган 14 кишилик топ, эндик өсүмдүгүнүн тамырын издеп, тоого кеткенден кийин дайынсыз жоголушкан.
Чаткал районунда жайгашкан Ак-Сай тоосунда дайынсыз жоголгон алты жаранды издөө иштерин улантууга тик учак тартылды.
Өзгөчө кырдаалдар министрлигинин (ӨКМ) маалыматына ылайык, тик учакты куткаруу иштерине тартууга министр Бообек Ажикеев буйрук берген. Тик учак бүгүн, 18-октябрда, саат 07:30да Ош шаарынан учуп чыкты.
9-октябрь күнү Каныш-Кыя айылынын тургундары жана бир чет элдик жаран, жалпы 14 адам, эндик өсүмдүгүнүн тамырын издеп, тоого кеткенден кийин дайынсыз жоголушкан.
Дайынсыз болуп жаткандардын арасында 1995-жылы туулган Сатыбалдиев Майрамбек да бар. Анын үч баласы бар, эң кенжеси беш айлык. Ал соңку убакта эндиктин тамырын казып сатып, иштеп жүргөнүн атасынын иниси Мамадалы “Азаттыкка” айтып берди:
“Анын атасы – агам мурда кайтыш болуп кеткен. Майрамбектин келинчеги, үч баласы бар. Кийинки убакта бош эле жүрдү. Анан үй-бүлөсүн багайын деп эндик казып сатып иштеп жүргөн. Алар эмне болуп көчкүнүн алдында калганын так билбейбиз. Эртең тик учак менен куткаруучулар келет деп жатышат. Ошондо чоо-жайы так билинет деп күтүп жатабыз. Апасы Бишкекте болчу, Манап деген иниси менен жолдо келатышат. Тилек деген агасы да Орусияда болчу, ал да эртең келип калат”.