Апта башында Оштун Араван районундагы айылдардын биринде жүздөн ашык киши чогулуп, жайыт жерди жеке колго берүүгө каршылык билдирип чыкты. Алар жайыт жерлер улам тарып баратканын, мурда дагы бир топ жер берилип кеткенин айтууда. Сөз болуп жаткан Достук айыл аймагына караштуу эки гектардай жерге эс алуу жай куруу ниетин парламенттин мурдагы депутаты билдирген экен. Бирок элдин каршылыгынан кийин ал сунушунан баш тартканы белгилүү болду.
