Тажикстан: айла-амал менен аскерге чакырылган уландар

1-апрелден баштап Тажикстанда аскерге чакыруу өнөктүгү башталды. Өлкөнүн бардык аймактарында жаштарды куралдуу күчтөрдүн катарына тартуунун ар түрдүү ыкмалары колдонулуп жатканы жөнүндө маалыматтар байма-бай тарап жатат. Тажикстандык активисттер бир райондо аскер курагындагы балдары бар үй-бүлөлөрдүн жарыгы өчүрүлүп, мамлекеттик мекемелерде аларга кызмат көрсөтүлбөй жатканын айтышты. Укук коргоочулар жаштардын армияда кызмат өтөөдөн баш тартуусунун бирден бир себеби андагы катаал шарт экенин белгилешет.