Киевге Орусия баллистикалык ракеталар менен сокку ургандан кийин 16 объектке зыян келтирилди.
Украинанын президенти Владимир Зеленскийдин айтымында, Орусиянын куралдуу күчтөрү Днепропетровск, Донецк, Житомир жана Одесса облустарындагы маанилүү инфратүзүмдөргө дагы сокку урган.
Зеленский Харьков облусундагы соккулардан жети адам, анын ичинде бир бала жараат алганын билдирди. Ал жерде турак үйлөр, май куюучу жай жана темир жол инфратүзүмү жабыркаган.
Чернигов облусунда үч адам жараат алып, турак үй менен энергия түйүнүнүн объекттери зыян тарткандыктан, миңдеген үй-бүлө жарыксыз калган.
"Орусияга болгон кысымды күчөтүү керек. Убакыт коротпостон, ушул аптада эле Евробиримдиктин санкциялык 21-пакетин кабыл алуу зарыл. Санкциялык чечимдердин кечиктирилген ар бир күнү Орусияга чектөөлөргө даярданууга кошумча убакыт берет. Орусия согушту узартуу жана адамдарга сокку уруу үчүн колдонуп жаткан бардык тетиктер - чиптер, микросхемалар, кош багыттагы товарлардын баары токтотулушу керек", - деп жазды Зеленский Телеграм-каналына.
Днепропетровск облустук аскердик администрациясынын башчысы Александр Ганжа Синельников районунда Орусиянын аткылоосунун эки адам каза болуп, дагы төрт киши жаракат алганын билдирди.
Никополь районунда агрофирма, жеке үйлөр жана чарбалык курулуштар, ал эми Каменск районунда айыл чарба ишканасы менен инфраструктура жабыркаган.
Киев түн ичинде кайрадан Орусиянын баллистикалык соккусуна кабылганын калаа башчысы Виталий Кличко билдирген. Чабуулдун кесепеттери шаардын эки районунда катталган. Ракеталык соккудан адамдар жабыркаган эмес.
Өзгөчө кырдаалдар мамлекеттик кызматынын маалыматы боюнча, Голосеев районунда кампа өрттөнүп, Дарница районунда ачык аянтта турган автоунаалар күйүп кеткен. Өрт өчүрүлгөн.
Украинанын Аскер-аба күчтөрү билдиргендей, абадан коргонуу күчтөрү түн ичинде учурулган сегиз баллистикалык "Искандер-М/С-400" ракетасынын бешөөнү, эки Х-59/69 башкарылуучу авиациялык ракетасын жана 108 учкучсуз учакты зыянсыздандырган.
Украиналык аскерлер бир баллистикалык ракета жана 25 сокку уруучу дрондун 17 аймакка тийгенин, 10 жерге ракета сыныктары түшкөнүн катташкан. Дагы эки баллистикалык ракета боюнча маалымат такталууда.
Орусиянын Коргоо министрлиги түн ичинде урулган соккулар менен Киевдеги "ар кандай типтеги ракеталарды жана учкучсуз учактарды иштеп чыгууга жана чыгарууга катышкан аскердик өнөр жай ишканалары" бутага алынганын билдирди.
Украина Франциянын Rafale ("Рафаль") кыргын салуучу учагынан 16ны алуу үчүн буюртма берди, алар өлкөнүн куралдуу күчтөрүнүн колуна 2028–2029-жылдары тийиши керек.
Бул тууралуу Франциянын президенти Эммануэл Макрон Украинанын президенти Владимир Зеленский, Германиянын канцлери Фридрих Мерц жана Британиянын премьер-министри Кир Стармер менен биргеликте өткөргөн маалымат жыйынында билдирди.
2025-жылдын ноябрында кол коюлган келишимге ылайык, Украина Rafale кыргын салуучу учагынан жүздү сатып алышы керек.
Муну менен катар Украинага өз аймагында бир катар куралдарды чыгарууга лицензия берилет. Алар: SAMP/T абадан коргонуу системаларына керектүү Aster-30 алыскы аралыкка учуучу зениттик ракеталары; SCALP-EG (британдык Storm Shadow ракетасынын көчүрмөсү) алыскы аралыкка учуучу авиациялык канаттуу ракеталары; катардагы авиабомбаларды алыстан башкарылуучу куралга айланткан AASM жогорку тактыктагы багыттоочу комплектиси.
Буга чейин Парижде өткөн "Тилектештер коалициясынын" жолугушуусунда Владимир Зеленский "Фремя" деп аталган баллистикага каршы системаны жана украиналык адистер ага ылайыктап иштеп чыккан ракеталарды тааныштырган. Зеленскийдин президентинин айтымында, алар 2026-жылдын соңуна чейин колдонулушу мүмкүн.
Франциянын президенти Киевдин өнөктөштөрү Украинадп коңшу мамлекеттерде аскердик машыгууларды баштоону макулдашканын кошумчалады. Бул машыгуулар Орусия менен ок атышууну токтотуу келишимине жетишилгенден кийин жайгаштырылышы мүмкүн болгон көп улуттуу күчтөрдү даярдоо алкагында өтөт.
Өз кезегинде Британиянын премьер-министри Кир Стармер Лондон Украинага аскердик жардам көрсөтүү боюнча 90 миллиард евролук европалык насыялоо программасына кошулганын жарыялады. Бул чечим британдык коргонуу ишканаларына Киевди колдоо программасынын алкагында каржылануучу келишимдерге катышууга жол ачат.
Макрон европалык өлкөлөрдү улуттук коргонуу долбоорлорунан баш тартып, курал-жарактарды биргелешип чыгарууга чакырды. Франциянын президенти Бастилияны алуу күнүнүн алдында сүйлөп жатып, аскердик программалардын бири-бирин кайталоосу Европанын коргонуу өнөр жайын алсыратарын белгиледи.
Анын айтымында, Европада учкучсуз учактарды, абадан коргонуу системаларын, ракеталарды жана ок-дарыларды чыгарууну тездетүү зарыл, анткени азыркы өндүрүш темпи өсүп жаткан суроо-талапка жооп бербей жатат.
Орусиялык аскерлер түндө Киевге баллистикалык ракета менен чабуул койду. Бул тууралуу шаар мэри Виталий Кличко билдиргенин "Азаттыктын" украин кызматы жазды.
Кличконун айтымында, Голосеев районундагы эки кампада өрт чыкты.
Дарница районунда ракетанын сыныктары ачык аянтка түшүп, ал жерде турган машинелер күйүп кетсе, мектептин жанынан чуңкур пайда болуп, имараттын айнектери күүлүп түшкөн.
Орусия буга чейин 11-июлда дагы Киевге баллистика менен сокку уруп, Соломенка, Дарница, Днепров райондору жабыркаган. Мындан кийин Украинанын президенти Владимир Зеленский Батыштагы өнөктөштөрүн баллистикалык ракетага каршы Patriot абадан коргонуу комплексине байланыштуу убадаларды аткарууга чакырган.
Орусиянын Москва облусунун губернатору Андрей Воробьев 13-июлга караган түндөгү дрон чабуулдарынан үч киши каза таап, бешөө жараат алганын билдирди.
Анын айтымында, облустун үстүнөн 81 дрон атып түшүрүлдү.
Истрадагы Пионерский кыштагында үч киши өлүп, бешөө жаракат алды. Беш жер тамда өрт чыкты.
Солнечногорскиде көп кабаттуу үйгө дрон тийип, эки киши жабыркады. Имараттын дубалыны зыян келтирилип, айнектери күбүлдү.
Бабкино кыштагында да жер тамдар зыянга учурады.
Орусиянын Ставропол крайынын бийлиги өнөр жай аймагында өрт чыкканын маалымдады. Азыр ошол жерде өрт өчүрүүчүлөр жана башка чукул кызматтар иштеп жатат.
Ал эми украиналык Exilenova+, Supernova+ мониторинг каналдары Михайловскиде мунай базасы күйүп жатканын жазышты.
Астра басылмасынын маалыматына караганда, Вязники хуторундагы темир жолго жакын орун алган мунай базасы тууралуу сөз болуп жатат.
Бул аталган калктуу пункттагы акыркы аптада бутага алынган экинчи мунай базасы.
Краснодар крайынын ыкчам штабы Темрюк районунда ишканалардын бирин өрт чалганын кабарлады. Учкучсуз аппараттын калдыгы Ильич кыштагында жер тамдын айланасына түшкөн.
Украиналык Телеграм каналдар NASA FIRMS сервисине таянуу менен Азов деңизинин акваториясында катталган өрт тууралуу кабарлап жатышат. Бул Орусиянын "көмүскө флотунун" танкерлерине сокку урулганына далил экенин белгилешүүдө.
Орусиянын Коргоо министрлиги 13-июлга караган түнү Волгоград, Владимир, Белгород, Брянск, Калуга, Курс, Липецк, Орел, Ростов, Рязан, Тула облустарында, Москва облусунда, Краснодар крайында, аннексияланган Крымда, Адыгей, Азов жана Кара деңиз акваторияларында 342 украиналык дронду атып түшүргөнүн маалымдады.
Орусия Украинага негизсиз кол салган 2022-жылдын февралынан бери күн сайын сокку уруп келет, андан бери бейкүнөө өлгөн кишилер, жараат алгандар миңдеп саналат. Миңдеген киши үй-жайын таштап кетүүгө аргасыз болду. Миңдеген киши жакындарын жоготуп, миңдеген бала жетим калды. Украинанын шаар-кыштактары, инфраструктурасы талкаланды. Киев өзүнө кол салууга жооп иретинде, Орусиянын мунай заводдорун жана башка армияны каржылаган объектилерине сокку уруп келатат. Украин тарап мунай жайларына чабуулдарын быйыл жаздан тарта күчөтүп, Орусиянын өзүндө эле эмес, андан кара май алган өлкөлөрдө да кризис пайда болду.