Орусиянын армиясы 13-июлда Украинанын Одесса шаарындагы транспорт ишканасына сокку урду.
Бул тууралуу шаардык аскердик администрациясынын башчысы Сергей Лысак билдирди.
Анын айтымында, автобустар өрттөнүп, төрт жер тамга зыян келтирилди. Үч киши жабыркап, орто оор абалда ооруканага жеткирилди.
Запорожьеде 12-июлдун түнү Орусиянын чабуулунан алты киши жабыркады, арасында 15 жаштагы өспүрүм да бар экенин облустук аскердик администрациясынын башчысы Иван Федоров маалымдады.
Анын маалыматына караганда, көп кабаттуу 11 турак жайга зыян келтирилди, үйлөрдүн бири олуттуу бузулду. Тиешелүү коммуналдык кызматтар чабуулдун кесепеттери менен күрөшүүдө.
Орусиянын дрондору 12-июлда Кривой Рогдогу өнөр жай ишканасына дрондор менен сокку урду.
Эки киши каза тапканын шаардын Коргоо кеңешинин башчысы Александр Вилкул билдирди. Анын маалыматына караганда, аталган ишканадан тышкары калаанын инфраструктурасына зыян келтирилди.
Дрон соккусуна Днепропетров облусунун Никопол району да кабылды, ал жакта 66 жаштагы тургун каза тапканын жергиликтүү бийлик билдирди. Административдик имараттар, жер тамдар, чарбалык курулуштар жана жүк ташуучу автоунаа зыянга учураган. Днепр шаарында тамак-аш өнөр жай ишканасы чабуулга кабылган.
Херсон шаарынын Корабельный районунда соккулардан бир киши каза таап, үчөө жараат алганын калаанын администрация башчысы Ярослав Шанько маалымдады.
Эртең менен орусиялык аскерлер эки жолу Херсондо коомдук транспортту аткылады, дрондор маршруттук такси менен аялдаманы бутага алган. Кеминде беш киши жараат алган.
Харьковдо эки киши, анын ичинде 16 жаштагы кыз жараат алганын облустук администрациянын башчысы Олег Синегубов маалымдады.
Харьков шаарынын мэри Игорь Терехов Шевченков районунда 20дан ашуун турак жайга зыян келтирилип, Киев районунда гараж кооперативи өрттөнүп кеткенин кабарлады.
Украин тараптын билдирүүсүндө, 12-июлга оогон түнү Орусиянын армиясы 13 ракета, ар кандай түрдөгү 115 учуучу аппарат менен чабуул койгон. Бул түнү орус тарап баллистикалык ракета колдонгон жок. Башкарылуучу эки авиациялык ракета тийген эки учур катталды. 12 жерге 19 дрон тийгенин Украинанын Куралдуу күчтөрү жарыялады.
Украинанын аскер күчтөрү 12-июлга караган түнү Орусиянын Самара облусундагы Сызран шаарында жайгашкан мунай иштетүүчү заводго дрондор менен чабуул койду. Облус губернатору Вячеслав Федорищев өнөр жай ишканасына чабуул болгонун, турак үйлөр зыян тартканын, бир адам каза болгонун билдирди. Анын айтымында, дагы үч адам, анын ичинде бир бала жаракат алган.
ASTRA басылмасы буга чейин мониторинг жүргүзгөн каналдар жарыялаган видеолордун тартылган жерин аныктаган. Алардан көрүнгөндөй, Сызрандагы мунай иштетүүчү заводдун аймагында өрт чыккан.
Сызран заводу — Орусиядагы эң ири мунайды кайра иштетүүчү ишканалардын бири болуп саналат жана «Роснефть» компаниясынын курамына кирет. Буга чейин украин аскерлери бул ишканага бир нече жолу сокку урган.
Ростов облусунун башчысы Юрий Слюсарь 12-июлга караган түнү украин дрондору Азов деңизиндеги танкерди Азов–Кара деңиз каналына кирип бара жаткан учурда жабыркатканын билдирди. Ал ошондой эле Таганрог шаарына жана облустун бир катар райондоруна сокку урулганын маалымдады. Таганрог шаары катары менен үчүнчү түн чабуулга кабылды.
Буга чейин Украина армиясы акыркы күндөрү Азов деңизинде ондогон орус кемелери бутага алынганын билдирген. Маалыматтарга ылайык, Азов–Кара деңиз каналы кемелердин кыймылы үчүн жабылган.
Украинанын учкучсуз системалар күчтөрүнүн жетекчиси Роберт Бровди бир түндүн ичинде дагы 14 орус кемеси бутага алынганын, ал эми акыркы бир жума ичинде мындай чабуулдардын саны 90го жеткенин жазды.
Орусиянын Коргоо министрлиги бир түндүн ичинде абадан коргонуу күчтөрү Украинанын 349 учкучсуз учагын жок кылганын билдирди. Бирок канча дрон бутага жеткени же атып түшүрүлбөй калганы тууралуу маалымат берилген жок.
Орусиянын Краснодар крайында мугалимдерди айдоочуларды тынчтандыруу үчүн май куюучу жайларда (АЗС) нөөмөткө турууга мажбурлап жатышат. Мындай көрсөтмөнү Динск райондук администрациясы мектептерге жөнөткөн. Педагогдор эмгек өргүүсүндө болсо да май куюучу жайларга барып, тартипти көзөмөлдөөгө тийиш. Бул үчүн аларга акысыз чай жана кофе берилет.
Социалдык тармактарда бул буйрук катуу нааразычылык жаратты, мугалимдердин өздөрү да нааразы болушууда. «Антиджоб.нет» Telegram каналы мугалимдердин биринин пикирин жарыялады:
«Биз, жаш мугалимдер, салмагыбыз 50 килограммга да жетпейт, бирок май куюучу жайдагы ачууланган адамдарды тынчтандырууга тийиш экенбиз. Акысыз жана милдеттүү түрдө. Антпесе маселе жаралат. Андан көрө жумуштан кетип калыш керек»
«Живая Кубань» басылмасынын кабарчысы Динск райондук администрациясынын Билим берүү башкармалыгына кайрылганда, алар мугалимдердин нөөмөт өтөп жатканын ырастады. Мугалимдер өздөрү эле, негизинен эркектер ыктыярдуу түрдө чыгарын билдирди.
«Эч кимди мажбурлап жаткан жокпуз. Айрыкча аялдарды. Эркектер өздөрү ыктыярчы болуп чыгышат, анткени станциялардагы кырдаал аларга да тиешелүү. Ошондуктан нөөмөттөргө толугу менен ыктыярчылар катышууда. Алардын арасында аялдар жок».
Псков облусунда да бийлик өкүлдөрү «Сургутнефтегаз» компаниясынын май куюучу жайларында нөөмөт өтөө үчүн «ыктыярчыларды» издеп жатышат. Алар айдоочуларга күйүүчү май берүү эрежелерин түшүндүрүп, кезектерди жөнгө салууга жардам бериши керек. Бул үчүн кандай сый акы берилери жарыяда көрсөтүлгөн эмес. Ал эми «Псковнефтепродукт» май куюучу жайларында элдик кошуундун мүчөлөрү нөөмөт өтөшүүдө.
«7x7» аймактык басылмасы билдиргендей, Карелияда, Мордовияда, Орёл, Нижний Новгород, Липецк, Псков, Астрахань жана Киров облустарында унаанын мамлекеттик номуру жуп же так сан менен аяктаганына жараша бензин берүү тартиби киргизилери тууралуу SMS билдирүүлөр таратылууда. Иркутск облусунун бийлиги кезектерди азайтуу үчүн май куюучу жайларга электрондук жазылуу системасын киргизүүнү сунуштады деп жазат «Сибирский экспресс».
Пермь шаарында бензин тартыштыгына байланыштуу митинг өткөрүү боюнча расмий билдирүү берилди.
Мындан башка нааразылык акцияларын уюштуруу аракети тууралуу маалымат жок.
«Новая газета Европа» басылмасы Vox-Harbor долбоору менен биргеликте жүргүзгөн эсептөөгө ылайык, 2026-жылдын 1-майынан бери Telegram тармагында күйүүчү май кризиси тууралуу 6,6 миң пост жана бензин тартыштыгынан жабылган май куюучу жайлар жөнүндө колдонуучулардын 39,7 миң комментарий жарыяланган.
Күйүүчү май кризиси тууралуу алгачкы кабарлар 6, 12 жана 22-май күндөрү Нижний Новгород, Ярославль жана Пермь шаарларындагы мунай иштетүүчү заводдорго чабуулдардан кийин пайда болгон. Бензин тартыштыгы жөнүндө маалыматтар 29-майда көбөйө баштаган. Ошол күнү Крымдын бийлиги АИ-95 бензинин сатууну суткасына 20 литр деп чектеген.
Телеграмдагы эң катуу талкуу 18-июнда, Москвага согуш башталгандан берки эң чоң дрондук чабуул жасалган соң башталган. Ошондон бери бензин жетишсиздиги тууралуу орточо эсеп менен күн сайын 350дөн ашык пост жарыяланып келет.
Колдонуучулардын комментарийлерине караганда, кризис эң катуу Орусия Украинадан оккупациялап алган аймактарда, Москвада жана Москва облусунда, өлкөнүн түштүгүндө сезилүүдө. Талкуулардын саны боюнча алдыңкы орунда аннексияланган Крым турат. Андан кийин Москва, өзүн «Донецк Элдик Республикасы» деп атап алган аймак, Краснодар крайы, Ростов жана Москва облустары турат.
Украинанын орусиялык мунай иштетүүчү заводдорго жана башка мунай инфраструктурасына жасаган соккуларынын фонунда Орусиянын дээрлик бардык аймактарында, аннексияланган Крымда жана оккупацияланган аймактарда күйүүчү май тартыштыгы жана узун кезектер байкалууда.
Reuters агенттигинин маалыматына ылайык, учурда Орусиядагы бензин өндүрүшү сезондук суроо-талаптын 65% гана жаап жатат.