Орусиянын аскерлери 11-июлда күндүз Сумы шаарынын Заречный районуна абадан бомба таштады. Акыркы маалыматтар боюнча, кеминде беш адам каза болуп, 30у жараат алды. Каза болгондордун арасында бала бар. Полициянын маалыматында, сокку урулган тушта аялдамада турган 13 жаштагы кыздын өмүрү кыйылган.
Сумы облустук администрациясынын башчысы Олег Григоровдун билдиришинче, аралыктан башкарылуучу эки авиабомба жолду жана коомдук транспорт токтоочу аялдаманы кыйраткан. Ал жерде жай тургундар, автоунаалар жана коомдук транспорт болгон.
Экинчи сокку инфратүзүм объектисине урулган. Григоровдун айтымында, авиабомбалар түшкөн жердин жанындагы көп кабаттуу турак үйлөр да бүлгүнгө учураган.
Орусиянын соккуларынан Украинада жай тургундар күн сайын каза табууда. БУУнун маалыматы боюнча, июнь айында Украинада кеминде 265 жай тургундун өлүмү расмий ырасталган.
Одесса облустук аскердик администрациянын төрагасы Олег Кипер Орусиянын ракеталык соккусунан алдын ала маалыматтар боюнча эки адам каза тапканын билдирди.
Анын айтымында, 24 жаштагы бир адам жараат алган.
Кипер Орусия жарандык инфратүзүмдү бутага алганын жана кырсык болгон жерде куткаруу иштери жүрүп жатканын кабарлады.
Бүгүн, 11-июлда саат 11:00 чамасында Украинанын Аба күчтөрү Орусиядан Одессага карай ракета учурулганын эскертишкен.
Облустук аскердик администрациянын маалыматында, Орусиянын аскерлери Одесса облусунун түштүгүндөгү аймактын жарандык инфратүзүмдөрүнө да сокку урган. Анын кесепетинен эмкана, кеминде үч жеке турак үй жана инфратүзүмдүк объекттер бүлгүнгө учураган.
Украинанын Аба күчтөрүнүн маалыматында, 11-июлга караган түнү орусиялык армия Украинага карай 120 дрон жана 12 ракета учурган. Мындан кийин украин президенти Владимир Зеленский Батыштагы өнөктөштөрүн НАТО саммитиндеги Украинага "Патриот" системасын чыгарууга лицензия берүү убадасын жана биргелешкен европалык антибаллистикалык долбоор боюнча макулдашууларды болушунча тездетүүгө чакырган.
Владимир Зеленский 11-июлга караган түнү орус армиясы Украинага 120 дрон жана 12 ракета учурганын айтты.
"Алардын жарымы баллистикалык ракеталар. Биздин коргоочулар баллистикадан башкасын атып түшүрүүгө үлгүрдү. НАТОнун жыйынында макулдашылган, элибизди коргоого багытталган колдоо пакеттери боюнча убадалардын аткарылышын күтөбүз. "Патриотторго" лицензия алуу жана биргелешкен европалык антибаллистикалык долбоор боюнча макулдашууларды болушунча тездетүү керек", - деп жазды украин президенти Телеграм-каналына.
Киевге сокку урулуп, 11 адам жараат алды
Ишембиге караган түнү Орусия Украинанын борборуна дрондор жана ракеталар менен дагы сокку урду. Украинанын куткаруу кызматтары кеминде 10 адам жараат алганын билдирүүдө. Киевдин мэри Виталий Кличко өзүнүн Телеграм-каналында жабыркагандардын арасында 11 жаштагы бала бар экенин жазды. Кийинчерээк жараат алгандардын саны 11ге жеткени белгилүү болду.
Шаардын Днепр районунда соккунун кесепетинен турак эмес имараттан өрт чыгып, учурда ал толугу менен өчүрүлдү.
Украинанын армиясы бул түнү өлкө аймагына жалпысынан алты баллистикалык ракета учурулганын билдирди.
Украинанын Аба күчтөрүнүн басма сөз кызматы Телеграм-каналында Орусиянын Х-59/69 үлгүсүндөгү эки башкарылуучу авиациялык ракетасы жана ар кандай типтеги 111 учкучсуз учуучу аппараты атып түшүрүлгөнүн билдирди.
Украин аскерлери 11 локацияда баллистикалык ракеталар, эки башкарылуучу авиациялык ракета жана жети сокку уруучу дрон бутага тийгенин, ошондой эле үч локацияда атып түшүрүлгөн аппараттардын сыныктары чачыраганын катташкан. Радиолокацияга каршы ракета боюнча маалыматтар такталууда.
Жума күнү Украинанын президенти Владимир Зеленский жакын арада АКШ Украинага "Искандер", "Кинжал" жана башка орусиялык ракеталарды атып түшүрүүгө жөндөмдүү Patriot абадан коргонуу тутумдары үчүн жаңы ок-дарыларды өткөрүп берерин билдирген.