29-майга караган түнү Румыниянын Галац шаарында орусиялык дрон көп кабаттуу турак жайга тийди.
Румыниянын Коргоо министрлиги билдиргендей, дрон өлкөнүн аба мейкиндигине киргени радарда катталып, аны кармоо үчүн истребителдер менен тик учактар көтөрүлгөн. Аны атып түшүрүүгө жетише электе көп кабаттуу үйдүн чатырына тийип, өрт тутанган.
Румыниянын Өзгөчө кырдаалдар боюнча башкы инспектораты эки киши жараат алганын ырастады. Мекеменин маалыматына караганда, көп кабаттуу үйдөн 70 киши эвакуацияланды.
Интернетте тараган сүрөттөрдөн дрон шаардын түштүгүнө тийгенин көрүүгө болот. Бул аймактан Украинанын чек арасына чейин аралык 11 чакырымдан ашат.
Буга чейин румын Коргоо министрлиги Орусиянын Украинага чабуулдары учурунда Румыниянын аймагына дрондор кирген же кулаган 45 учур тууралуу кабарлаган. Бирок алар Румыниянын Украина менен чектешкен эл жашабаган аймактарда катталган.
Бул эл жыш жайгашкан районго дрон учуп, карапайым тургундар жараат алган биринчи окуя болду.
Латвиянын парламенти 28-майда жаңы өкмөттүн курамын бекитти. Мурдагы коалиция өлкөгө украиналык дрондордун учуп киришине байланышкан окуядан кийин тараган.
100 депутаттан турган Сейм депутаттарынын 66сы премьер-министр кызматына 47 жаштагы Андрис Кулбергстин талапкерлигин колдоду. Ал латыш өкмөтүн быйыл 3-октябрга белгиленген парламенттик шайлоого чейин башкарат.
Мурдагы премьер Эвика Силиня коргоо министри отставкага кеткенден кийин 14-майда кызматын тапшырган.
7-май күнү украиналык эки дрон Латвия аймагына, анын ичинде Резекнедеги мунай заводунун айланасына кулаган соң бул өлкөдө саясий кризис жаралган. Премьер-министр Эвика Силинянын сындоосунан кийин коргоо министри Андрис Спрудс кызматтан кеткен. Андан кийин өкмөт бөлүнүп, премьер-министр Силиня өзү да кызматтан кетүүгө арыз берген. 17-майда Латвиянын асманына кайрадан дрон учуп кирген.
Украинанын Тышкы иштер министрлиги ошол кезде маалымат таратып, дрондор Латвиянын аймагына орусиялык радиоэлектрондук жабдуулардан улам түшүүсү ыктымалдыгын билдирген.
Орусиядагы бутага бет алган украиналык дрон болушу ыктымал делген учкучсуз учак шейшембиде Эстониянын үстүнөн атып түшүрүлгөн.
Украинанын Жогорку радасы Евробиримдиктен 90 млрд евро өлчөмүндө пайызсыз насыя алуу тууралуу келишимди 28-майда ратификациялады. Бул тууралуу парламенттин басма сөз кызматы билдирди. Документти колдоп 298 депутат добуш берген.
Келишим жакынкы эки жыл ичинде Евробиримдиктен жалпы суммасы 90 миллиард еврого чейин каржылык жардам алууга мүмкүнчүлүк берет.
Бул каражат мамлекеттик бюджеттин тартыштыгын жабууга, макроэкономикалык туруктуулукту камсыз кылууга жана коргонуу-өнөр жай потенциалын чыңдоого, анын ичинде курал-жарак өндүрүүгө жана сатып алууга жумшалат.
Жогорку раданын билдирүүсүндө насыянын негизги суммасы Орусиядан өндүрүлө турган репарациялардын эсебинен гана төлөнөрү айтылат. (Эгер келечекте согуш аяктап, Орусия Украинага компенсация же репарация төлөп берүүгө милдеттендирилсе, ошол акчанын бир бөлүгү ушул насыяны жабууга жумшалат) Ал эми пайыздык төлөмдөрүн Евробиримдиктин бюжети жабат.
Башкача айтканда, Украина бул насыяны өз каражаты менен кайтарбайт деген механизм сунушталууда.
Еврошаркетке мүчө өлкөлөр бере турган 90 миллиард евро “бюжеттик” жана “аскердик” болуп экиге бөлүнөт.
“Аскердик” бөлүктүн алгачкы алты миллиард евролук траншы июнь айында эле которулат деп күтүлүүдө.
Ал эми “бюжеттик” бөлүктү алуу үчүн бир катар шарттар коюлган. Алардын арасында реформаларга байланыштуу мыйзам долбоорлорун кабыл алуу, айрыкча коррупцияга каршы багыттагы өзгөртүүлөр бар.
Еврокомиссиянын башчысы Урсула фон дер Ляйен бүгүн алгачкы төлөмдөр июнь айында эле башталышы мүмкүн экенин ырастады.
Бул насыянын бөлүнүшүн бир топ убакыт бою Венгриянын мурдагы премьер-министри Виктор Орбандын өкмөтү бөгөттөп келген.
Орусиянын армиясы 26-майга караган түнү Украинанын бир нече аймагында ракета жана дрондор менен сокку урду.
Одесса облусунда чабуулдардан бир киши каза таап, кеминде үчөө жараат алганын дубандын губернатору Олег Кипер Телеграмга жазды.
Одесса шаардык аскердик администрациясынын башчысы Сергей Лысак сокку эл жашаган аймакка урулганын кабарлады.
Украинанын Өзгөчө кырдаалдар кызматы шаардын инфраструктуралык объектисине зыян келтирилгенин кабарлады.
Мекеменин маалыматына караганда, Полтава облусунда да жеке сектор жана инфраструктура объектилери талкаланды. Полтава районунда турак жай талкаланып, бир аял жараат алды. Сумы облусунун Ромны шаарында үч киши жабыркады.
Запорожьеге орус аскерлеринин чабуулунан үч киши жараат алганын облустук аскердик администрациянын башчысы Иван Федоров билдирди. Херсон облусунун Никольское кыштагында түнкү артиллериялык аткылоолордон бир киши каза тапканын облустук прокуратура кабарлады.
Украин Аба күчтөрү 26-майга оогон түнү Орусия эки баллистикалык ракета, 122 учкучсуз учак учурганын, 111 дрон атып түшүрүлгөнүн билдирди.
Орусиянын Коргоо министрлиги эртең мененки күнүмдүк маалыматында 26-майга караган түнү украиналык 59 дрон кармалып, атып түшүрүлгөнүн жарыялады. Дрондор Белгород, Брянск, Курск, Новгород, Смоленск облустары менен аннексияланган Крымдын үстүндө жок кылынганын кошумчалады. Түштөн кийин Орусиянын Белгород облусунун ыкчам штабы Крутой Лог айылында 25-майдын кечинде дрон автоунаага сокку урганда айдоочу каза болгонун кабарлады. Штаб окуянын чоо-жай тууралуу башка маалымат берген жок.
25-майда Орусиянын Тышкы иштер министрлиги Киевге такай сокку уруларын эскертип, чет элдиктер менен дипломаттарды шаардан чыгып кетүүгө чакырган.
Ал тапта Украинага 24-майдагы жапырт соккулардын курмандыктары көбөйдү. Киевде дагы бир кишинин сөөгү уранды алдынан табылган. Муну менен каза тапкандар үчкө жетип, жараат алгандардын саны 100дөн ашты.