26-октябрга караган түнү Орусиянын аскерлери Киевге сокку уруп, шаардагы Десянский аймагында учкучсуз учактын сыныктары тогуз кабаттуу турак үйгө тийип, экинчи кабатта өрт чыккан. Анын кесепетинен үч киши каза болгонун калаа мэри Виталий Кличко билдирди.
Десянскиде дрон жарылуусунан көп кабаттуу үйдүн айнеги күбүлгөн. Дагы бир учкучсуз учактын сыныктары 16 кабаттуу үйгө кулаган.
Украинанын аба күчтөрүнүн маалыматында, Орусия Украинага 101 дрон учуруп , анын 90у атып түшүрүлгөн. Бешөө төрт объектиге тийген.
Украинанын президенти Зеленский соккудан кийинки видеону Телеграм-каналына жүктөп, "Орусиянын ар бир соккусу - жай турмушка болушунча зыян келтирүү" деп жазды.
Зеленский кошумчалагандай, Орусия соңку аптада Украинага ар кандай курал-жарак менен миңден ашуун сокку урган. Анын ичинде 1200ү дрон, 1360ү кол менен башкарылган авиациялык бомба, 50дөн ашууну түрдүү ракеталар менен жасалган.
Орусиянын армиясы 25-октябрга караган түнү Украинаны “Искандар-М” үлгүсүндөгү тогуз баллистикалык ракета жана 60тан ашык дрон менен аткылады.
Өлкөнүн Абадан коргоо күчтөрү төрт ракета жана 50дөй учкучсуз аппарат атып түшүрүлгөнүн билдирди. Украин бийлиги ракеталар кайсы аймакка түшкөнү тууралуу маалымат берген жок.
Киев шаарында ишембиге караган түнү катуу жарылуулар болду. Шаар мэри Виталий Кличко борбор калаа баллистикалык ракеталар менен аткыланганын кабарлаган.
Шаардын аскердик администрациясынын башчысы Тимур Ткаченко соңку чабуулда эки адам мерт болуп, дагы ондой киши жараат алганын билдирди. Полициянын ырасташынча, анда көп кабаттуу үйлөр, бир бала бакча жана машиналар жабыркады жана соккудан улам тутанган өрттү өчүрүү уланууда.
Орусиянын армиясы ишембиге караган түнү Украинанын борбору Киев шаарын ракета менен аткылады. Шаардын мэри Виталий Кличко телеграм-каналына кеминде сегиз адам жараат алганын, алардын үчөө ооруканага жеткирилгенин жазды. Кличко кандай объекттерге сокку урулганын тактаган жок. Анын алдында Орусия шаарды баллистикалык ракеталар менен аткылаганын кабарлаган.
Ал арада Орусиянын борбору Москва шаарынын мэри Сергей Собянин 25-октябрга караган түнү жети учкучсыз аппарат атып түшүрүлгөнүн билдирди. Өзүнүн телеграм-каналына дрондордун сыныгы кулаган аймактарда чукул кырдаалдар кызматтарынын адистери иштеп жатканын жазды. Собянин чабуулдун кесепети, кандай имараттар бутага алынганын маалымдаган жок. Анын алдында Орусиянын Волгоград, Ленинград, Иванов, Воронеж жана Пенза облустары дагы дрон чабуулуна кабылганы тууралуу маалыматтар чыккан.
Согуш маалында мындай билдирүүлөрдү бейтарап булактардан ырастоо мүмкүн эмес.
АКШ “Роснефть” жана “Лукойл” компанияларына санкция салгандан кийин Кытайдын мамлекеттик ишканалары деңиз аркылуу орус мунайын сатып алууну токтоткону кабарланды. Бул тууралуу Reuters агенттиги булактарына таянып жазды.
Агенттиктин билдиришинче, сөз кытайлык Sinopec, CNOOC жана Zhenhua Oil компаниялары жөнүндө болууда. Reuters мындан тышкары индиялык мунайды кайра иштетүүчү заводдор да Орусиядан импортун азайтышы мүмкүн экенин жазды.
Кытай күн сайын деңиз аркылуу орто эсеп менен 1,4 миллион баррел орус мунайын импорттойт. Анын негизги бөлүгүн көз карандысыз ишканалар, анын ичинде мунай иштетүүчү чакан заводдор сатып алышат. Vortexa Analytics компаниясынын аналитиктеринин баалоосу боюнча, мамлекеттик ишканалар күнүнө 250 миң баррелден аз мунай алат. Energy Aspects аналитикалык компаниясынын маалыматтарына караганда, бул көлөм суткасына 500 миң баррелге чейин жетет.
Бир нече трейдер "көз карандысыз мунай иштетүүчү заводдор санкциялардын таасирин баалоо үчүн сатып алууларды убактылуу токтотушарын, бирок орус мунайын сатып алууну улантууга аракет кылышарын" агенттикке билдирген.