16-октябрда Украинанын баш калаасы Киевде жана бир нече облусунда Орусиянын чабуулдарынан улам авариялык түрдө электр жарыгын өчүрүү чаралары киргизилди.
Украинанын Энергетика министрлигинин маалыматына караганда, авариялык өчүрүүлөр Киев, Харьков, Сумы, Полтава, Запорожье, Кировоград, Днепропетровск, Хмельницкий, Житомир жана Черкассы облустарында жүргүзүлдү.
Соңку күндөрү орусиялык армиянын соккуларына туш болгон Чернигов облусунда электр энергиясын саат сайын өчүрүү графиги колдонулат. Мындай чектөөлөргө өнөр жай ишканалары да туш болушу мүмкүн.
Украин бийлигинин маалыматына ылайык, акыркы жума ичинде Орусия Украинанын энергетикалык объектилерине болгон чабуулдарын күчөттү. Бутага Киевдеги жылуулук электр станциялары да алынды. 16-октябрга караган түнү Орусия коңшу өлкөнүн Чернигов, Полтава жана Винница облустарына дрон жана ракета менен сокку урду. Чернигов облустук аскердик администрациясынын башчысы Вячеслав Чаус облус жапырт чабуулга кабылганын жана бир нече турак үй жабыркаганын билдирди. Алдын ала маалыматтарга караганда, эки адам жаракат алды.
Полтава облусунда түнкү чабуулдардан кийин айрым өндүрүш ишканалары убактылуу ишин токтотту.
Украин президенти Владимир Зеленский билдиргендей, Орусия 300дөн ашык дрон жана 37 ракета колдонду. Анын айтымында, бул жолку чабуулдарда негизинен өлкөнүн энергетикалык жана жарандык инфраструктурасы бутага алынды.
Кыш жакындаган сайын Орусиянын Украинадагы энергетикалык объектилерге кол салуулары күчөп жатат. Далилдерге карабастан Москва карапайым жарандар менен жарандык объектилерди бутага алганын четке кагууда.
Британия 15-октябрда Орусияга карата салынган санкциялык тизмесин кеңейтти. Бул тууралуу британ өкмөтүнүн сайтына чыккан маалыматка караганда, “кара тизмеге” орусиялык “Роснефть” жана “Лукойл” ири компаниялары киргени жазылган.
Мындан тышкары санкцияга орусиялык “көмүскө флотко” тиешеси бар делген 51 кеме, ошондой эле Трансстройбанк, Примсоцбанк, ББР банк жана Солид банк илинген. Бул тизмеге Орусиянын Улуттук төлөм карталар системасы жана бир нече жеке адамдар да кирди. Жалпысынан чектөөгө илинген 90 адам жана уюм болду, алардын арасында кытайлык, индиялык жана сингапурдук компаниялар да бар.
Мындай чечимдин түшүндүрмөсүндө “Роснефть” менен “Лукойл” Орусиянын өкмөтү үчүн стратегиялык мааниге ээ, тагыраагы, энергетикалык сектордо иш жүргүзгөнү үчүн бул тизмеге илингени жазылган.
“Роснефть” мамлекеттик корпорациясы буга чейин Евробиримдиктин санкциялык тизмесине кирген. Британия “Чоң жетинин” ичинен “Лукойлду” “кара тизмеге” киргизген биринчи мамлекет болуп калды. Евробиримдик бул компанияга чара көрүүнү талкуулап жатат, ал эми АКШ азырынча эч кандай чектөөчү чечим кабыл ала элек.
Москванын Басман соту орус оппозициячыл саясатчылары Владимир Кара-Мурза менен Илья Яшинди сыртынан камакка алуу чечимин чыгарды. Аларга карата "экстремисттик уюмдун ишине катышкан жана армияны каралаган “фейк” маалымат тараткан" деген күнөө тагылган. Буга чейин бул эки саясатчыга издөө жарыяланып, террорчулардын жана экстремисттердин реестрине киргизилгени белгилүү болгон.
Путиндин бийлигинин сынчылары болгон Владимир Кара-Мурза менен Илья Яшин буга чейин орус түрмөлөрүндө отуруп, былтыр жайында Батыш өлкөлөрү менен туткун айырбаштоо жолу аркылуу орус абагынан чыккан.
Ага чейин Яшин орус аскерлеринин Украинанын Буча шаарындагы жай тургундарга каршы жасаган кылмыштары тууралуу айткандан кийин мекенинде “фейк маалымат тараткан” деп айыпталып, 8,5 жылга кесилген.
Кара-Мурза болсо "орусиялык аскерлер Украинада жай тургундар жашаган жерлерди, төрөт үйлөрүн, ооруканаларды жана мектептерди бомбалоодо" деген сөзү үчүн 25 жылга соттолгон.
Эркиндикке чыккан соң саясатчылар Европада жашап, бозгундагы башка орус активисттери жана саясатчылары менен бирге акцияларды уюштуруп келет.
Буга чейин орус атайын кызматтары бир нече орусиялык таанымал оппозициялык саясатчыга жана коомдук ишмерге бийликти күч менен басып алуу жана террордук уюм түзүү беренеси менен айып таккан. Алардын арасында ЮКОС компаниясынын мурдагы жетекчиси Михаил Ходорковский, мурдагы премьер-министр Михаил Касьянов, коомдук ишмер Леонид Гозман, саясатчылар Дмитрий Гудков, Юрий Пивоваров жана башкалар бар.
АКШ президенти Дональд Трамп Украина чабуулга өтө башташы ыктымал экенин билдирди. 15-октябрда Кошмо Штаттардын Федералдык иликтөө бюросунун директору Кэш Пател менен жолугушуудан кийинки биргелешкен пресс-конференцияда журналисттердин суроолоруна жооп берип жатып Трамп украин тарап мындай аракетке даярданып жаткан болушу мүмкүн экенин айтты.
Украинага курал жарактын Tomahawk ракеталарынан башка да түрлөрүн берүү планы бар же жогу тууралуу суроого Трамп башка варианттарды карап жатканын, бул боюнча чечим кабыл алышы керек экенин билдирди.
Трамп Украина маселесин 17-октябрда Владимир Зеленский менен жолукканда талкуулай турганын айтып:
"Алар чабуулга өтүүнү каалашат", - деди жана "Биз чечим кабыл алышыбыз керек" деп кошумчалады.
10-октябрда украин президенти Зеленский журналисттерге АКШ президенти менен телефондон сүйлөшкөндө Орусияны ок атууну токтотуу үчүн Украинага канча америкалык Tomahawk ракеталары керек деген пикири менен бөлүшкөнүн айткан. Буга чейин Орусия бир нече жолу Украинага узак аралыкка жетүүчү ракетанын берилиши боюнча тынчсыздануусун билдирген. Орус президенти Владимир Путин мындай кадам “согуштун жүрүшүн өзгөртпөй” турганын билдирген.