Орусияда Пермь крайынын Березники шаарында жайгашкан "Азот" химия заводу учкучсуз учактардын чабуулуна кабылганын аймактын башчысы Дмитрий Махонин 3-октябрда кабарлап, бул үчүн Украинаны айыптады.
Губернатордун айтымында, технологиялык цикл бир саамга токтоп, азыр ишкана кадимки тартибинде иштеп жатат.
"Экологиялык абалга коркунуч жок, адамдардын коопсуздугуна да коркунуч келтирген эч нерсе жок", - деген Махонин турак үйлөрдүн бири зыян тартканын, адамдар арасында жоготуу катталбаганын кошумчалады.
Ал эми бир катар жалпыга маалымдоо каражаттары химиялык заводдун аймагында кеминде эки жолу жарылуу болгонун жергиликүү тургундар айтып бергенин жазышты.
"Азот" заводу жер семирткич өндүрүлүүчү ири ишканалардын бири. Ал жерде жардыргыч заттар үчүн да компоненттер жасалат.
Березники шаары Украинанын чек арасынан дээрлик 1,5 миң чакырым алыс жайгашкан аймак.
Орусиянын Коргоо министрлиги Пермь крайындагы сокку тууралуу расмий маалымат берген жок. Болгону 3-октябрга караган түнү Кара деңиздин акваториясында, Воронеж, Белгород жана Курск облустарында, аннексияланган Крым жарым аралында Украинанын кеминде 20 согуштук дрону атып түшүрүлгөнүн кабарлады.
Орусия коңшусу Украинага каршы толук масштабдуу согушун 2022-жылдын февралында баштаган, ошондон бери куралдын көптөгөн түрлөрүнөн күн сайын аткылап келатат.
Орусиянын президенти Владимир Путин бейшембиде “Валдай” эл аралык талкуу клубунун жыйынында сүйлөп жатып Европанын куралдануусу күчөгөн учурда Москва да жооп чараларын көрүшү мүмкүн экенин билдирди. Ал процесстин тездик менен жүрүп жатканын белгиледи.
“Мисалы, Германия кайрадан Европадагы эң күчтүү армия болушубуз керек деп жатат. Макул, биз муну кунт коюп угуп, эмнени кыйытканын көрүп турабыз. Орусиянын жооп чаралары көп күттүрбөйт деп ойлойм, буга эч кимдин күмөнү жок. Жооп өтө ишенимдүү болот. Бул дал жооп чара. Биз өзүбүз эч качан аскердик каршылашууну баштаган эмеспиз”, - деди Украинага каршы согуш ачканына төрт жылга аяк баскан Орусиянын президенти Путин.
Орус лидери Украинадагы согуштун уланышы үчүн Европа өлкөлөрүн күнөөлөдү.
“Тилекке каршы, азырынча согуш аракеттерин токтото албай жатабыз. Бирок мунун жоопкерчилиги көпчүлүктө эмес, азчылыктын мойнунда, биринчи кезекте - жаңжалды тынымсыз күчөтүп жаткан Европада”, – деди Путин.
Сентябрдан тартып Евробиримдик өлкөлөрүнүн аба мейкиндигине орус дрондору бир канча ирет киргени тууралуу маалымат тарады. Ошондой эле Дания, Германия жана башка бир катар мамлекеттердеги маанилүү инфраструктура объектилеринин үстүнөн белгисиз учкучсуз аппараттар байкалган.
1-октябрда Копенгагенде өткөн ЕБ саммитинде лидерлер бул окуяларды эске алуу менен коопсуздук маселесин талкуулашты. Айрыкча Еврокомиссия мурда сунуштаган биримдиктин чыгыш чек арасын бойлой “дрондор дубалын” куруу демилгеси көтөрүлдү. Бир катар лидерлер бул демилгени колдоп, ал учкучсуз аппараттардын чабуулунан коргоо системаларын кеңири жайылтууну камтый турганын белгилешти.
Орусия 2022-жылдын февралынан бери Украинага каршы кеңири масштабдуу согушун улантып келет. Ал орус аскерлеринин украин жерине басып кириши менен башталган.
Кремль Украина жана европалык өлкөлөр сунуштаган узак мөөнөттүү ок атышууну токтотуу сунушун четке какты. Москва муну “жаңжалдын түпкү себептерин жоюу зарыл” деп түшүндүрүп келет. Орус бийлиги “түпкү себеп” катары Украинадагы орус тилдүү жарандардын укуктарынын бузулушун жана Киевдин НАТОго кирүүгө умтулуусун атаган.
Германияда 2-октябрда асманда пайда болгон белгисиз дрондун айынан Мюнхен шаарынын аэропортунда 17 рейс убактылуу токтотулду. AFP агенттиги 3-октябрда Германиянын федералдык полициясынын өкүлүнүн маалыматына таянып билдиргендей, аэропорттун жанында дрон учуп жүргөнүн айрым жарандар кабарлашкан, көп өтпөй учкучсуз учак аба майданынын так үстүнөн учканын көргөндөр да болгон.
Полиция тегеректе издөө, иликтөө иштерин жүргүзгөнү, бирок эч кимди аныктай албаганын DPA агенттиги маалымдады.
Каттамдардын тартиби бузулгандыктан 3 миңдей жүргүнчү убагында уча албаганы айтылды.
Мюнхен шаарында бул күндөрү Октоберфест иш-чарасы өтүп жатат, адатта ага дүйнөнүн чар тарабынан көптөгөн коноктор барат.
Сентябрь айында Даниянын аэропортторунун жана аскердик объектилеринин үстүнөн белгисиз дрондор учканы катталган. Белгисиз учактар аба мейкиндигинин чек арасынан өтүп кеткенин Польша, Эстония жана Румыния да айтып чыгышкан.
Бул үчүн аталган өлкөлөр Орусияны айыпташкан. Орус бийлиги мындай кинени четке каккан.
2-октябрда Европа саясий бирлигинин жыйынында сүйлөп жатып үч жылдан ашык убакыттан бери Орусиянын тынымсыз аткылоосуна кабылып келаткан Украинанын президенти Владимир Зеленский Европанын кайсы гана жери болбосун, Орусиянын дрон соккусуна кабылышы ыктымал экенин эскерткен.
"Орустар Польшага каршы дрон колдонууга, Түндүк Европанын аба мейкиндигин бузууга батынып жаткан болсо, демек, мындайга Батыш Европа да, түштүк да кабылышы мүмкүн", - деген украин лидери.
Орусия жана Украина согуш туткундарын айырбаштады. Украинанын президенти Владимир Зеленский бул маалыматты бышыктап, 183 катардагы аскерлер менен сержанттар, эки офицер жана 20 карапайым киши үйүнө кайтарылганын билдирди.
"Биздин жоокерлер Мариуполду жана „Азовстальды“, Чернобыл АЭСин коргогон. Көбү 2022-жылдан бери туткунда болчу, акыры алар үйдө", - деп жазды Зеленский.
Ага чейин Орусиянын Коргоо министрлиги 23-июлда Стамбул шаарында жетишилген макулдашууга ылайык орусиялык 185 аскер кайтарылганын, украиналык 185 аскер өткөрүлүп берилгенин маалымдаган. Мекеме андан тышкары 20 карапайым киши кайтып келгенин кошумчалады. Маалыматка ылайык, ушу тапта аларга Беларуста медициналык жана психологиялык жардам көрсөтүлүүдө.
Буга чейин тараптар акыркы жолу августтун аягында 146дан туткундан алмашкан. Ошондо украин аймагына кирип кеткен Курск облусунун сегиз тургуну да кайтарылган.
Ага чейин Стамбулдагы сүйлөшүүлөрдүн натыйжасында мындан көп киши айырбашталган.
Май жана июнда өткөн кездешүүлөрдө украин жана орус делегациялары башка олуттуу мунасага жетише алган эмес.