Украинанын президенти Владимир Зеленский Орусиянын президенти Владимир Путин менен Казакстанда жолугууга даяр экенин АКШдагы сапары учурунда билдирди. Fox News телеканалынын эфиринде журналисттин орус-украин сүйлөшүүлөрү тууралуу суроосуна жооп берип жатып ал жолугушуу үчүн нейтралдуу аянтча катары сунушталган бир катар өлкөлөрдү атады.
"Трамптын жана менин командам, европалыктар, Макрон жана башка лидерлер, Түркиянын президенти, баарыбыз Түркия, Сауд Арабия, Катар, Европанын нейтралдуу өлкөлөрү, Австрия, Швейцарияда жолугушууну сунуштадык. Биз кайсыл жерде болсун, мисалы, Казакстанда болобу, биз даярбыз", - деди Зеленский.
Ал украин тарап эл аралык өнөктөштөрдүн катышуусунда өтсүн деген талап менен сүйлөшүүлөргө ачык экенин кошумчалады.
Мурдараак орус президенти Владимир Путин жолугушууну Москвада өткөрүүнү сунуштаган. Зеленский муну "ишке ашпаган" вариант деп атаган. Буга жооп катары Кремлдин басма сөз катчысы Дмитрий Песков РБКга курган маегинде Зеленскийдин Москвага келүүдөн баш тартканына таң калганын билдирген.
Москва жолугушууну Казакстанда өткөрүү сунушуна жооп бере элек, бирок Украинанын Швейцария жана Австрия сыяктуу өлкөлөрдө өткөрүү сунушу “кабыл алынгыс” экени белгиленген.
Астана бир нече жолу дүйнөлүк геосаясий маселелер боюнча сүйлөшүүлөрдө аянтча болуп келген. Казакстандын баш калаасында Сириядагы аскерий жаңжалды жөнгө салуу боюнча көптөгөн сүйлөшүүлөр өткөн.
Бириккен Улуттар Уюмунун Башкы ассамблеясына катышканы барган казак президенти Касым-Жомарт Токаев менен украин президенти Владимир Зеленский 23-сентябрда эки тараптуу жолугушуу өткөрүп, Украинадагы согушту токтотуу жолдорун жана келечекте Украинаны кайра куруу иштерине казак компанияларын тартуу мүмкүндүгүн талкуулашкан.
Эки лидердин беш жылдан берки алгачкы жолугушуусу толугу менен англис тилинде өткөнүн казакстандык делегация билдирген. Токаев украин тарап менен дипломатиялык алаканы улантуу зарыл экенин белгилеген.
"Слідство.Інфо" басылмасы Орусия туткунга алган украиналык журналист Виктория Рощина 2024-жылдын 19-сентябрында Пермь крайынын Кизел шаарындагы №3 убактылуу тергөө абагында каза болгонун аныктады. Буга чейин Рощина өмүрүнүн акыркы күндөрүн Таганрогдогу тергөө абагында өткөргөнү, аны 2024-жылдын 8-сентябрында камерасынан белгисиз жакка алып кетишкени маалымдалган.
"Слідство.Інфо" басылмасынын журналисттеринин колуна Рощина каза болгону тууралуу кагаздын көчүрмөсү тийген. Аны Перм шаарынын ЗАГС мекемеси берген. Документте журналист 2024-жылдын 19-сентябрында каза болгону жазылган. Бул маалыматты Украинанын Башкы прокуратурасы дагы ырастады. Викториянын сөөгүн орус бийлиги толук соттук-медициналык экспертиза жүргүзүүгө мүмкүнчүлүк берилбеген абалда Украинага өткөрүп берген.
Быйыл жазында Украинанын Ички иштер министрлиги анын сөөгү февралдын соңунда болгон репатриациянын алкагында өткөрүлгөнүн, ДНК экспертиза сөөк журналистке таандык экенин көрсөткөнүн билдирген.
Рощина "Азаттыктын" украин кызматы менен да кызматташкан, согуш тууралуу баяндап турган. 2023-жылдын август айында Запорожье облусунун оккупацияланган аймагында орус аскерлеринин туткунуна түшкөн. Таганрогдогу абактан Москвага которуп жатышканда каза болгон. Өлүмүнүн себеби тууралуу так маалымат жок.
Украинада Рощинанын өлүмүнө байланыштуу кылмыш иши козголгон. Согуш мыйзамдарынын бузулушу жана атайылап адам өлтүрүү деген негизде козголгон ишти Башкы прокуратура тергеп жатат.
Украин бийлигинин маалыматына караганда, Орусияда отузга жакын украин журналисти туткунда кармалууда.
Орусиянын Краснодар аймагынын губернатору Вениамин Кондратьев Новороссийск шаарынын борборунда дрон чабуулунан эки киши каза тапканын билдирди.
"Шаардын борборуна, "Новороссийск" мейманканасынын аймагына сокку урулду. Баштапкы маалыматтарга караганда, эки киши каза таап, үчөө жараат алганы белгилүү. Беш турак жайга зыян келтирилди, анын ичинде көп кабаттуу үй, мейманкананын имараттары. Соккунун мизин кайтаруу уланууда", – деп жазды ал Телеграм-каналына.
Shot Телеграм-каналы жараат алгандардын саны сегизге жеткенин маалымдады.
Чабуулдан улам эки көп кабаттуу үйдүн чатыры жана эки батирде өрт тутанды. Электр чыгырыктарын ижарага берген сервистин кеңсеси өрттөнүп жатканы, анын жер төлөсүндө үч киши камалып калганы кабарланууда.
Каспий түтүк өткөргүч консорциуму (КТК) кеңсесине зыян келтирилгенин, жараат алгандардын экөө өз кызматкерлери экенин кабарлады.
Кондратьев дрон соккулары үчүн Украинаны айыптады. Киев комментарий бере элек.
Учкучсуз учактар Башкырстандагы "Газпром нефтехим Салават" ишканасына 24-сентябрда сокку урду. Маалыматты Орусияга караштуу Башкырстан Республикасынын башчысы Радий Хабиров ырастады.
"Зыяндын даражасын аныктап атабыз. Жеринде чукул кызматтар иштеп, өрттү өчүрүү аракети көрүлүүдө", – деп жазды ал Телеграм-каналына.
Ишкана жайгашкан Салават шаарынын тургундары жарылуулардын добушу угулганын айтууда.
Орусиялык жана украиналык Телеграм-каналдар жарыялаган сүрөт-видеолордон ишкана орун алган аймакта коюу түтүн абага көтөрүлгөнүн көрүүгө болот.
Украин бийлиги чабуул болгонун ырастады.
"Газпром нефтехим Салават" ишканасына 18-сентябрда да дрон соккусу болгон.
Украина тарап акыркы убакта Орусиянын мунай заводдоруна чабуулдарын күчөттү. Мындан улам Орусиянын өзүндө мунай тартыш болуп, андан бензин алган өлкөлөрдө, анын ичинде Кыргызстанда күйүүчү майдын баасы көтөрүлдү.