22-сентябрдын кечинде Москва жана Подмосковье аймагы учкучсуз учактардын чабуулуна кабылганын мэр Сергей Собянин билдирди. Анын айтымында, абадан коргонуу системалары чабуулдун мизин кайтарган. Кийинчерээк Собянин тогуз учкучсуз учак атып түшүрүлгөнүн кабарлады жана алдын ала маалыматтарга караганда жабыркагандар жок. Мэр түн ичинде дагы башка дрондор атып түшүрүлгөнүн, түн жарымында алардын саны 15ке жеткенин билдирди.
Мунун алдында Москва району жана Москва облусунда жарылуу болгону тууралуу маалыматтар социалдык тармактарга жарыяланган. Москванын бир нече райондорунда жарылуунун добушу угулганын бир катар Телеграм-каналдар жазып чыгышты. Москва жана Подмосковье аймагынын жашоочуларынын айткандарын "Осторожно, Москва" каналы жазды. Жалпысынан 10дон кем эмес жарылуу болгону кабарланды. Абадан айгай жарыяланган жок.
"База" басылмасы Москвадагы аэропорттордун иши токтотулганын жазды. Flightradar24 сервисиндеги маалыматка караганда, Москвага багыт алган бир катар каттамдар артка кайткан. Социалдык тармактарда дрондор учурулган учурда бир учак өтө төмөн, турак жайлардын үстүнөн учуп баратканы тартылган видео тарады.
"Росавиация" Шереметьево аэропортуна чектөө киргенин билдирди. "База" басылмасы дрондордун бири Реутов шаарына түшүп, анын сыныктарынан автоунаа зыян тартканын жазды.
Москва бийлиги украин учкучсуз учактары чабуул койгонун, алар борборго жетпей атып түшүрүлгөнүн маал-маалы менен кабарлап келет. Мунун айынан 2025-жылы бир нече жолу аэропорттордун иштери үзгүлтүккө учураган.
22-сентябрга караган түнү Орусия Украинанын Запорожье аймагына жок эле дегенде беш авиабомба менен сокку урду. Чабуулдун кесепетинен кеминде эки кишинин өмүрү кыйылганын, дагы экөө жараат алганын, алардын биринин абалын дарыгерлер оор деп мүнөздөп жатканын Запорожье аймактык аскердик администрациясынын башчысы Иван Федоров билдирди.
Жайкын тургундар жашаган үйлөр кыйроого учурап, жарандык инфраструктура жана өнөр жай ишканалары да жабыр тартканын маалымдаган облус башчысы улам бир жерде өрт тутанган, өрт өчүрүүчүлөр иштеп жаткан сүрөттөрдү жарыялады.
Ошондой эле дүйшөмбүгө караган түнү Орусиянын учкучсуз учактары Украинанын Киев облусун бутага алганы кабарлады. Бориспол районунда үч кабаттуу үйдө өрт чыкканын, 32 жаштагы жергиликтүү тургунга сынык тийип, ал ийининен жараат алганан Киев облустук аскердик администрациясынын башчысы Николай Калашник жазды. Жергиликтүү басылмалар согуштук дрондор Бориспол аэропорту көздөй учуп баратканын кабарлашкан, бул Украинанын борбор шаарынын негизги аба дарбазасы экени белгилүү. Обухов районунда атып түшүрүлгөн дрондун сыныктары көп кабаттуу үйгө, жанындагы жер тамдардын бирине тийген.
Таңга жуук Сумы аймагы да дрон чабуулуна кабылганын жергиликтүү администрация башчысы Сергей Кривошеенко маалымдап, жайкын тургундар жашаган жерлерде өрт тутанганын, өнөр жай ишканалары, билим берүү мекемеси зыянга учураганын кошумчалады.
Борбор калаа Киевде да абадан чабуул тууралуу эскертүү берилип, айгай салып жатышты.
2022-жылы Орусия Украинага басып кирип, согуш ачкандан бери Москванын тастыкталган жоготуулары 133 117 адамга жетти. Согушта набыт болгондордун аты-жөнүн "Медиазона", Би-би-си радиосунун орус кызматы жана ыктыярчылар ачык булактарга таянып тактаган.
Бул эки апта мурдагы маалыматка караганда 5 миңге көп. Каза болгондордун 28% согуш башталгандан кийин армияда кызмат өтөөгө келишим түзгөндөр. Иликтөөнүн авторлору алардын үлүшү өсүп жатканын белгилешкен. Экинчи орунда согушка орус абактарынан барган соттолуучулар. Аймактар боюнча алганда каза болгондордун басымдуу бөлүгү Башкырстандын тургундары (6632), кийинки орунда тувалыктар турат.
Каза болгондордун реалдуу саны мындан бир кыйла көп болушу мүмкүн.
Орусия менен Украина өздөрүнүн жоготуулары тууралуу расмий түрдө өтө сейрек кабарлашат.
Украинанын Днепропетровск облусу 20-сентябрга караган түнү орус армиясынын жапырт соккусуна кабылды. Облустун администрация башчысы Сергей Лысак чабуулда ракета жана учкучсуз учактар колдонулганын билдирди.
Бир киши каза болду, кеминде 26 адам жараат алды, алардын 14ү ооруканага жеткирилди. Бир канча жерде өрт тутанды. Көп кабаттуу үй, жер там, чарба курулуштары, гараж зыян тартты.
Павлоградда ишкана зыян тартып, өрт чыкты. Никополь районунда FPV дрону жана артиллерия соккусунан жеке турак жай күйүп кетти.
Ишембиге караган түнү Украинанын Киев, Николаев, Одесса, Хмельницкий облустары чабуулдарга дуушар болду. Бул күнү өлкөдө 3 киши каза болгонун Украинанын президенти Владмир Зеленский билдирди.
Украинанын Куралдуу күчтөрүнүн маалыматына караганда, орус армиясы 19-сентябрдын кечинен тартып жалпысынан 579 учкучсуз учак, 8 баллистикалык, 32 канаттуу ракете учурду. Дрондун 552си, эки баллистикалык, 29 канаттуу ракета атып түшүрүлүп, зыянсыздандырылган.
Расмий Москва соңку соккулар тууралуу комментарий бере элек.
Ал эми Орусияда 20-сентябрга караган түнү украин армиясы мунайды кайра иштетүүчү эки заводуна сокку урганы маалымдалды. Украинанын Куралдуу күчтөрү билдиргендей, учкучсуз учактардын чабуулунан Саратов районундагы мунай иштетүү заводунда ири өрт чыкты. Новокуйбышевскиде заводдо от тутанды.
Орусиянын Коргоо министрлиги мунай заводуна жасалган чабуул тууралуу кабарлаган жок. Мекеме тараткан маалыматка караганда, түнү Саратов облусунда 27, Новокуйбышевскиде завод жайгашкан аймакта 15 украин дрону жок кылынды.