10-сентябрга караган түнү Украина Орусиянын кезектеги чабуулуна кабылганын, түрдүү типтеги 415 дрон жана 40тан ашуун канаттуу жана баллистикалык ракета менен сокку урулганын өлкө башчысы Владимир Зеленский билдирди.
Хмельницкий облусунда тигүү цехи бутага алынганы, жалпысынан 15 облус аткыланганы, Житомир облусунда адам өмүрү кыйылганы маалымдалды.
Украинага сокку урулуп жаткан чакта анын коңшусу Польшанын аймагына да орусиялык учкучсуз учактар кирип барганын кошумчалаган Зеленский Польша мүчө болгон НАТО аймагында Орусиянын бир эмес сегиз дрону учуп түшүрүлгөнүн кошумчалады жана муну "эскалация, Европа үчүн өтө кооптуу окуя" деп атады.
Орусия Украинаны дрон менен аткылап жатканда алардын айрымдары Польшанын аймагына чейин жетип, кээ бир жерлерине сыныктары түшүп калган окуялар буга чейин да болгон. Бирок бир нече учкучсуз учак кармалганы, Польша аларды атып түшүрүүгө абадан коргонуу күчтөрүн колдонууга мажбур болгону биринчи жолу катталууда.
Польшанын абадан коргонуу күчтөрү өлкөнүн аба мейкиндигине тыштан кирип кеткен учкучсуз учуучу аппараттарды жок кылышты. Бул тууралуу 10-сентябрда эртең менен Польшанын куралдуу күчтөрүнүн ыкчам командачылыгы билдирди.
Билдирүүдө өлкөнүн аба мейкиндиги Орусиянын Украина аймагына жасаган аба соккулары учурунда “дрон сымал объектилер” менен бир нече жолу бузулганы айтылат. Польшанын аскерлери бул объектилерди жок кылуу үчүн курал колдонгон. Маалыматка ылайык, аскерий операция уланууда. Подляска, Мазовецк жана Люблинск аймактарынын жашоочуларына үйдөн чыкпай туруу зарыл экени эскертилди.
Reuters агенттиги АКШнын Жарандык авиация башкармалыгына шилтеме кылып Польшанын төрт аба майданында, анын ичинде Варшавадагы Шопен аэропортунда иш убактылуу токтотулганын жазды.
Украинанын аймагына жасалган аба соккулары учурунда Польшанын аба мейкиндиги бузулганы тууралуу маалыматтар буга чейин дагы чыккан. Бирок Польша абадан коргонуу күчтөрүн колдонгон алгачкы учур экенин Reuters жазды.
АКШнын президенти Дональд Трамп Европа өлкөлөрүнө Пекин менен Делини Орусиянын энергетикалык ресурстарын сатып алууну кыскартууга же токтотууга көндүрүү үчүн Кытай менен Индиядан ташылган товарларга жогорку импорттук бажы алымдарын киргизүүнү сунуштады. Трамптын айтымында, АКШ дагы ушундай эле тариф киргизет.
Американын маалымат каражаттары жазгандай, мындай сунушун Трамп ушул тапта администрациясынын жогорку өкүлдөрү менен келечектеги санкцияларды талкуулап жаткан ЕБ делегациясы менен телефондон сүйлөшкөн учурда айтты.
АКШнын президенти эки өлкөнүн импортуна 100% пошлина киргизүү мүмкүнчүлүгүн билдирген.
The Financial Times басылмасынын Ак үйдөгү булагы президент "мындай кадам Кытай мунай сатып алуудан баш тартканга чейин кармалып турушу керек" деп эсептейт.
Америкалык жана европалык өкүлдөрдүн жолугушуусуна Украинанын премьер-министри Юлия Свириденко катышып, Орусияны согушка жумшаган ресурстарынан ажыратуу үчүн чечкиндүү чараларды көрүүгө чакырды.
Август айында президент Трамп Дели орус мунайын сатып алууну кыскартуудан баш тартканы үчүн индиялык товарларга импорттук алымдарды эки эсе кыскартып, 50 пайызга чейин түшүргөн. Учурда кытай товарларынын көбүнө 30 пайыздык салык төлөнөт. Дональд Трамп Кытай менен соода сүйлөшүүлөрүн узартып, бул өлкөнүн импортуна тарифтин 145% чейин көтөрүлүшүн кийинкиге жылдырган.
Францияда президент Эммануэл Макрон өкмөттүн жаңы башчысы кылып коргоо министри Себастьен Лекорнюну дайындады. 39 жаштагы жаңы премьер-министр Макрон 2017-жылы президент болуп шайлангандан бери өкмөттө туруктуу иштеп келаткан жалгыз министр.
Аны Макрондун ишенимдүү өкүлү деп аташат, ал Орусиянын кол салуусуна кабылган Украинага аскердик жардамды күчөтүүнү, улантууну жактаган француз саясатчыларынын бири катары таанымал.
Соңку эки жылдан бери Францияда ушуну менен өкмөт башчы бешинчи жолу алмашып олтурат. Буга чейинки премьер-министр Франсуа Байру тогуз ай иштеди, 8-сентябрда парламент анын бюджеттик реформаларына байланыштуу ишеним көрсөтпөө жарыялаган. Ал өкмөт өтө сарамжал иштеп, бюджеттеги киреше менен чыгашанын айырмасын кескин азайтуусу керек деген саясат жүргүзүп жаткан.
Бир жыл мурда Макрон ашынган оңчул күчтөрдүн бекемделишине жол бербөө максатында парламентти таркатып, жаңы шайлоо жарыялаган. Шайлоодо жеңип келген партиялар парламенттин төмөнкү палатасында үч топко бөлүнүп, бири да көпчүлүктү түзө албай жатат.