1-сентябрда Орусиянын күчтөрү Запорожье облусунда жайгашкан Пологи районунун Омельник айылына абадан сокку урду. Бул тууралуу Запорожье облусунун аскердик администрациясынын башчысы Иван Федоров маалымдады.
Анын айтымында, соккуга көп кабаттуу үйлөр туш болгон. Кол салуудан бир нече үй талкаланып, алардын биринде жашаган 64 жаштагы жубайлар каза болгон.
Украинанын Куралдуу күчтөрүнүн аба күчтөрү билдиргендей, 1-сентябрга караган түнү Орусия Украинанын аймагына жалпы 86 дрон менен сокку жасаган. Алардын 76сын Украина атып түшүрдү.
Сумы облусуна болгон чабуулдан эки адам жаракат алды.
Орус армиясы 30-августка караган түнү да Украинанын Запорожье шаарына сокку уруп, андан бир киши каза тапты, 22си жараат алган, арасында үч бала бар.
Москва далилдерге карабастан Украинанын шаарлары менен айылдарынын жарандык инфраструктурасына чабуул жасап, социалдык объектилерин талкалап жатканын четке кагып келет.
Украин бийлиги жана эл аралык уюмдар бул соккуларды Орусиянын "аскердик кылмышы" катары санайт.
Европа мамлекеттери согуш аяктагандан кийин Украинага коопсуздук кепилдиги катары аскер жайгаштыруу боюнча так план иштеп жатат.
Бул тууралуу Financial Times басылмасына маегинде Еврокомиссиянын төрайымы Урсула фон дер Ляйен билдирип, шаркет АКШнын колдоосуна таянарын кошумчалады.
Анын айтымында, аскер жөнөтүү чечимин биримдиктеги ар бир өлкө өз алдынча кабыл алат, бирок болочоктогу ыктымал миссиянын кандай болору белгилүү болуп калды.
Кошмо Штаттардын президенти Дональд Трамп Украинага аскер жөнөтүлбөй турганын, бирок Европага зарыл болгон учурда жардам берерин билдирген.
Фон дер Ляйен коопсуздук кепилдиги боюнча талкуулар жакшы жүрүп, ага Америка да катышып жатканын айтты. Бирок толук аалымат берген жок.
Трамптан Украинага бир катар Европа мамлекеттеринен аскер жайгаштыруу ыктымалдыгы боюнча колдоо алганын, 4-сентябрда Парижде Улуу Британия, Франция, Германия, ЕБ жана НАТО жетекчилери коопсуздук кепилдигин талкуулоо үчүн чогуларын белгиледи.
Урсула фон дер Ляйен украин армиясын каржылоо маанилүү экенине да токтолду. Анын айтымында, согуш аяктагандан кийин да каржылоо уланышы керек.
Ал АКШнын тынчтыкка келүү тууралуу аракетине карабай Орусиянын президенти Владимир Путиндин кадамы өзгөрбөгөнүн кошумчалады.
"Трамп тынчтыкты каалап, Путин болсо сүйлөшүүгө келбей жатат", - деди Еврокомиссиянын башчысы.
НАТОдогу бир катар Батыш өлкөлөрү Украинага согуш токтогондон кийин коопсуздукка кепилдик катары аскерин жайгаштырууга даяр экенин жарыялаган. Москва буга макул эместигин билдирип жатат.
Украинанын Жогорку Радасынын мурдагы төрагасы Андрей Парубийдин өлтүрүүгө шектүү кармалды. Бул тууралуу украин президенти Владимир Зеленский cоцтармактагы баракчасына жазды. Президенттин маалыматы боюнча, кармалган адам биринчи көрсөтмөлөрүн берүүдө.
«Учурда бул кылмыштын бардык жагдайларын аныктоо боюнча чукул тергөө иштери жүрүп, коргоо органдары, прокуратуранын бардык командасы күнү-түнү иштеп жатат”-деп жазды Зеленский.
Шектүүнүн тек-жайы тууралуу ачык маалымат жок. Бирок Ички иштер министрлигинен ал адам Хмельницк облусунун аймагынан кармалганын кабарлады.
Украинанын Жогорку Радасынын мурдагы спикери Андрей Парубийди 30-августта Львовдо атып кетишкен. Кол салган кылмышкер курьер катары кийинип, кылмышты ишке ашырганын кабарланган.
53 жаштагы Андрей Парубий 2016-2019-жылдары Жогорку Радада спикер болгон. Ал Украинанын Европага багыт алышын колдоп келген.
Евромайдан мезгилинде ал чатыр лагеринин коменданты болуп, Майдандын коргонуу тармагын жетектеген. 2014-жылдын февралынан августуна чейин Украинанын Улуттук коопсуздук жана коргонуу кеңешинин катчысы кызматын аркалаган.
Парубий менен коштошуу 1-сентябрда Киевдеги Майданда өтөрү кабарланды.
Орусиянын Ички иштер министри Твердеги "Медное" мемориалдык комплексинде поляк аскерлеринин көрүстөнүндө акция өткөргөн 39 байкердин өлкөгө киришине беш жылга тыюу салды.
Аларга миграциялык мыйзамды бузганы тууралуу протоколдор түзүлгөнүн "Медиазона" билдирди.
Акция 27-августта польшалык байкерлер сталиндик репрессиянын курмандыгы болгон жана 1940-жылы атылган Осташков лагеринде туткунда турган алты миңден ашуун поляк жоокери көмүлгөн бейиттин аймагында өткөн.
"Польшаны сүйөбүз"(Stowarzyszenie Kocham Polskę) бирлигинин байкерлери шам жагып, гүлчамбар коюп эскеришкен.
Орусиянын бийликти жактаган маалымат каражаттары акцияга бир нече күндөн кийин гана көңүл бура баштады. 30-августта РЕН ТВ акцияны чагым деп атаган материал чыгарган. Анда поляктар "антиорусиялык чакырыктарды таштап, шам кармаган жүрүш уюштурганы" айтылат.
Акция тууралуу кадрларда эч кандай символдор көрүнбөгөнү менен аталган телеканал байкерлерди "Бүткүл поляк жаштары" улуттук-католиктик уюм менен байланыштырган. Бийликчил телеграм-каналдар, анын ичинде Readovka жана "Рыбарь" басылмалары болсо акциянын катышуучуларын неонацисттик символду колдонду деп түз айыптап чыкты.
Мемориалдын кызматкерлери жагылган шамдарды көрүп, кишилердин добуштарын уккандан кийин полиция чакырганын билдиришкен. Мотоциклдерди туура эмес жерге токтоткондон башка коомдук тартип бузулганы тууралуу маалымат айтылган эмес.
"Медноедеги" акциядан кийин байкерлер тобу 1940-жылы туткундагы польшалык аскерлер атылган Катын токойуна, Смоленскидеги маркум президент Лех Качиньскинин учагы кыйраган жерге, Минскинин жанындагы Куропаты токойундагы сталиндик репрессиянын курмандыктары үчүн орнотулган мемориалга барышкан.
- Поляк бийлиги 2015–2019 Жеңиш күнүнө карата мотожүрүш уюштурган Орусиянын "Түнкү карышкырлар" клубунун байкерлеринин өлкөгө киришине тыюу салган. Варшава бул чечимин "коопсуздукка коркунуч" катары түшүндүргөн.
- Тверь облусундагы "Медное" комплекси 2000-жылы ачылган.
- Орусия Украинага басып кирген 2022-жылдан кийин Катындагы мемориалда жана "Медное" комплексинде поляк желеги алынган. 2023-жылдын октябрында "Медное" комплексинин сталиндик репрессиянын курмандыгы болгон советтик жарандар көмүлгөн бөлүгүндө Сталин, Ленин, Дзержинский жана Калининдин бюсттары орнотулган. Комплекстин директору Александр Чуносов бул кадам "логикага шайкеш жана түшүнүктүү" деп айткан.
- "Мемориал" уюму советтик башкаруучулардын скульптуралары Заманбап тарых мамлекеттик борбордук музейи менен "Медное" комплексинин директорунун буйругу менен коюлганын аныктаган.