18-апрелдин таңында орус армиясынын Харьков шаарына жасаган ракеталык соккусу калк жыш отурукташкан райондордун бирине тийди. Бул тууралуу жергиликтүү бийлик билдирди.
“Көп кабаттуу үйгө түз сокку урулду. Үйдүн урандыларынын алдында адамдар болушу мүмкүн” — деп билдирди калаа мэри Игорь Терехов.
Облустук аскердик администрациянын башчысы Олег Синегубовдун маалымдагандай,ракета Харьковдун Основянск районундагы көп батирлүү үйлөрдү бутага алган. Алдын ала маалымат боюнча, соккудан бир киши каза болуп, 70тен ашык адам жаракат алды. Жабыркагандардын арасында үч жана төрт жаштагы наристелер да бар.
Жалпысынан 20дан ашуун көп кабаттуу үч жана 30дан көп жеке менчик турак-жай жабыркаган.
Чабуулдар бул таңда Днепр шаарына дагы жасалды. Ал жакта фитнес-борбор, мейманкана жана кеңсе имараты жабыркаганын, каза болгондор жана жаракат алгандар жок экени маалым болду.
“Днепр. Абдан катуу үн чыкты. Толук маалымат кийин берилет. Аба чабуулу тууралуу эскертүү дагы эле күчүндө”, — деп жазды Днепропетров облусунун аскердик администрациясынын башчысы Сергей Лысак.
Орусиянын Коргоо министрлиги адатта жарандык жайларга сокку урганын четке кагып, бир гана аскердик обьекттерди бутага аларын билдирип келет.
Европанын алдыңкы мамлекеттеринин, АКШ жана Украинанын жогорку деңгээлдеги расмий өкүлдөрү 17-апрелде Парижге чогулду. Бул саммит Орусия менен Украинанын ортосундагы согушту токтотууга багытталган. Ага Американын президенти Дональд Трамптын атайын өкүлү Стив Уиткофф менен АКШнын мамлекеттик катчысы Марко Рубио, Франциянын президенти Эммануэл Макрон, Украинанын президентинин кеңешчиси Андрей Ермак катышууда.
Ушул эле саммитке Британиянын тышкы иштер катчысы Дэвид Ламми жана Германиянын канцлери Олаф Шольцтун жогорку кеңешчиси да чакырылган.
АКШнын мамлекеттик департаменти тараткан билдирүүдө бул сүйлөшүүлөрдүн максаты “Трамптын Орусия–Украина согушуна чекит коюп, кан төгүүнү токтотуу ниетин илгерилетүү” экени жазылган.
“Украинанын жана бүтүндөй Европанын коопсуздугу үчүн маанилүү маселелерди карап жатабыз”, - деп жазды X социалдык түйүнүнө Ермак. Ал кошумчалагандай, күн тартибинде эки тараптуу жана көп тараптуу сүйлөшүүлөр бар.
АКШ Киев менен Москваны ок атууну токтотуу сүйлөшүүлөрүнө түртүп жатса, Европа өлкөлөрү Украинаны колдоо жана мүмкүн болуучу аскердик миссия аркылуу ок атышпоо келишимин камсыз кылуу боюнча даярдыктарды көрүүдө.
Буга чейин, өткөн аптада Стив Уиткофф Санкт-Петербургда Орусиянын президенти Владимир Путин менен жолуккан. Андан соң Fox News телеканалына курган маегинде Уиткофф Путин “туруктуу тынчтык” орнотууну кааларын айтып, “беш облуска байланыштуу маселени” көтөргөнүн айтып берген.
Бул Орусия жарым-жартылай басып алган жана өзүнө караштуу деп жарыялаган Украина аймактары жөнүндө сөз болууда.
Москва АКШ президенти Дональд Трамп сунуштаган ок атууну токтотуу келишимине кошулуудан баш тартты. Орусия Батыш өлкөлөрүнөн Украинага курал жеткирүүнү токтотууну талап кылууда. Киев бул келишимди кабыл алган.
Акыркы күндөрү орус армиясы Украинанын шаарларына ракеталык соккуларын күчөттү.
Днепр шаары дрон чабуулуна кабылды, үч адам каза тапты
Украинанын Днепр шаары бейшембиге караган түнү орусиялык дрондордун жапырт чабуулуна кабылды. Акыркы маалыматта үч адам каза тапты, бирөө бала.
"30 адам жабыркаган, бешөө бала", - деп билдирди Днепропетровск обладминистрациясынын башчысы Сергей Лысак. Жалпы 30 адам жаракат алды, алардын арасында беш бала бар. 16 адам ооруканага жеткирилип, бирөө оор абалда жатат.
Лысактын айтымында, Днепрде ондогон көп кабаттуу жана ошончо сандагы жеке турак жайлар бузулган. Окуу жайынын корпусу, жатакана, гимназия, тамак-аш ишканасы ж.б. зыян келтирилген. Шаарда бир канча жерде өрт чыгып, өчүрүлгөн.
17-апрелде орус армиясы Херсондун Борбордук районуна да сокку урду.
"15 жаштагы өспүрүм оор жаракат алып, ооруканага жаткырылды", – деп билдирди шаардын аскердик администрациясынын башчысы Роман Мрочко.
Мындан сырткары, дагы эки эркек киши медициналык жардам сурап кайрылган.
Шаршемби кечинде Харьков облусу да соккуга кабылды. Изюм шаарына дрондор жана ракета атылганы кабарланды. Натыйжада алты адам жараат алган. Облустун ар кайсы аймактарында жалпы жонунан 17 киши жабыркаганы тууралуу маалыматты жергиликтүү бийлик ырастады.
Орус аскерлери Украинада фронттон алыс жайгашкан айыл-шаарларга дээрлик күн сайын “Шахед” тибиндеги дрондор менен чабуул коюп келишет.
Украин куралдуу күчтөрүнүн маалыматына ылайык, дрондордун басымдуу бөлүгүн атып түшүрүлүүдө.
Орус армиясы адатта бир гана аскердик жайларды бутага аларын билдирип, карапайым тургундар жашаган үйлөргө, жарандык инфратүзүмдөргө сокку урганын четке кагып келет.
Орусия өткөн түнү өз аймагында 26 дронду атып түшүргөнүн билдирди.
Орус Коргоо министрлиги маалымдагандай, тогуз дрон Воронеж, сегизи Белгород, төртөө Курск, экөө Липецк жана Москва аннексиялап алган Крымда, дагы бири Москванын аймагында жок кылынган.