АКШ президенти Дональд Трамптын Украина боюнча атайын өкүлү Кит Келлог бейшембиде Киевде украин президенти Владимир Зеленский менен жолугушту. Жолугушуунун аягында боло турган маалымат жыйыны Америка тараптын өтунүчү менен болгон жок. Бул тууралуу Reuters жана башка маалымат каражаттары жазышты.
"Америка авазы" маалымдагандай, Кит Келлог мурдараак Киевге сапарынын негизги максаты - украин тарапты угуу экенин билдирген.
Президент Трамптын улуттук коопсуздук боюнча кеңешчиси Майк Уолтц Украинаны АКШга сын пикирин жумшартууга чакырып, баалуу кен байлыктар боюнча Ак үй демилгелеп жаткан келишимдерге барууга үндөгөн.
АКШнын вице-президенти Жей Ди Вэнс бейшембиде конфликттин аягы чукулдап калганын билдирип, согушту Орусия менен сүйлөшүүлөрсүз токтотууга мүмкүн эместигин белгилеген.
Украинанын президенти Владимир Зеленский АКШнын чабарманы Кит Келлог менен сүйлөшүү учурунда согуштагы абал, Орусия туткундаган украин аскерлерин кайтаруу жана Украинанын коопсуздугу үчүн натыйжалуу эл аралык кепилдик маселеси талкууланганын билдирди.
"Европейская правда" басылмасы Зеленский Трамптын өкүлүнө "Киев АКШ президенти менен инвестиция жана коопсуздук жаатында аныгында пайдалуу жана күчтүү келишимге барууга макулдугун" билдиргенин жазды. Маалыматка ылайык, буга байланыштуу Трамптын Украинадагы баалуу кен байлыктары тууралуу сөз болгон.
Басылмалар жазгандай, Трамптын администрациясы Украинага сейрек кездешүүчү баалуу кен байлыктарга 50% менчик укугун берүүнү сунуштаган, бирок Зеленский документ менен таанышкан соң, ага кол коюудан баш тарткан.
Америкалык AXIOS жаңылык сайты Трамптын администрациясы Украинага баалуу кен байлыктар боюнча "жакшыртылган" келишимдин долбоорун сунуштаганын бейшембиде жазды. Сайт бул долбоор украин президенти АКШнын лидеринин алгачкы сунушун четке кагып, "ачуусуна тийгенден" кийинкиси экенин белгилеген.
Axios бул маалыматтарды украиналык, америкалык аткаминерлерге жана дагы келишим тууралуу маалыматы бар үч булагынын айткандарына таянып жазганын кабарлады. Алардын бири "келишимдин акыркы долбоору украин мыйзамдарына туура келгендей кыйла жакшыртылганын" билдирген.
Президент Трамптын кеңешчиси Майк Уолц Зеленский "сүйлөшүүгө кайтышы керектигин" журналисттерге билдирди.
Украинада Орусия тарапта согушкан Өскемен шаарынын эки тургуну каза болду. Бул тууралуу коңшу өлкөнүн Улуттук коопсуздук комитети билдирди. Маалыматка караганда, буга чейин мекеменин Чыгыш Казакстан облусу боюнча башкармалыгы аларга карата «Чет элдеги куралдуу кагылышууларга катышуу» беренеси боюнча кылмыш ишин козгогон. Кылмыш иши шектүүлөрдүн өлүмүнө байланыштуу токтотулган.
"2024-жылы бул жарандар Орусия Федерациясына кетип, Украинанын аймагындагы куралдуу кагылышууга катышып, Донецк облусунда алган жараатынан каза болушкан. Алардын сөөгү Өскемен шаарына жеткирилди. Соттук-медициналык экспертизанын корутундусуна ылайык, алар кансырап каза болгон", - деп айтылат УКМКнын билдирүүсүндө.
Согушка кеткендердин аты-жөнү, жашы, алардын каза болгон күнү айтыла элек.
Казакстанда чет өлкөдөгү согуштук аракеттерге катышкан жарандар мыйзамга ылайык жоопко тартылат. Өлкөнүн Кылмыш кодексинде эки берене бар – “Жалданмачылык” жана “Чет элдеги куралдуу кагылышууларга катышуу”. Биринчисинде жети жылдан 20 жылга чейин эркинен ажыратуу жана Казакстандын жарандыгынан ажыратуу, экинчисинде беш жылдан тогуз жылга чейин эркинен ажыратуу каралган.
Буга чейин "Азаттыкка" украин өкмөтү орус күчтөрүнүн катарында согушуп жүргөн 50дөн ашуун теги борбор азиялык жоокер туткунга түшкөнүн кабарлаган. Алардын арасында Борбор Азия өлкөлөрүнүн 30дан ашуун жараны бар. Алардын бири кыргыз, 21и казак, 18и тажик, 14ү өзбек улутундагылар экени айтылат. Арасында орус паспорту менен жүргөндөр да бар. Маселен, теги казак 21 туткундун алтоо гана Казакстандын жараны, калганы орус атуулдары.
Орусия 20-февралга караган түнү Украинанын Херсон облусуна авиа бомба менен чабуул койду. Жабыркаган бир нече кишинин арасында жашы жете элек балдар да бар. Бул тууралуу Херсон шаардык аскер администрациясынын башчысы Роман Мрочко билдирди.
Маалыматка караганда, Орусия өткөн түнү бул аймакка үч бомба менен чабуул койгон. Түнкү аткылоого Херсон шаарынын борбордук бөлүгүндөгү көп кабаттуу үйлөрдүн бири туш болгон.
Түнү бою жабыркагандар урандылардын астынан чыгарылды. 13 жаштагы эгиз балдар жабыркап, дагы кеминде үч чоң киши жарадар болгон. Үйдүн бир кире бериши жабыркап, бир бөлүгү урап калган.
Одессага экинчи күн катары менен дрон чабуулуна кабылды. Аскердик администрациянын башчысы Олег Кипердин айтымында, кеминде бир адам жабыркаган. Кол салуудан улам шаардын беш миңге чукул калкы бар району электр жарыгы жок калган.
Шаар мэри Геннадий Труханов жарандык инфраструктурага жасалган чабуулдун натыйжасында айрым тургундардын үйлөрүндө жылуулук өчүрүлгөнүн билдирди.
Орусиянын армиясы бир гана аскердик жайларды бутага алганын билдирип, карапайым тургундар жашаган аймактарга сокку урганын четке кагып келет. Ал эми жайкын тургундардын жабыркашын Украинанын абадан коргонуу системасынан көрөт.
Орусия 2022-жылдын 24-февралында Украинага кеңири масштабдагы согуш ачкан. Бириккен Улуттар Уюмунун (БУУ) маалыматына ылайык, 2024-жылдын ноябрына чейин Украинада 12 миңден ашуун адам өлүп, 27 миңге жакыны жаракат алган.
Ошондой эле БУУ орусиялык аскерлер адамдарды өлтүрүп, уурдап, кыйнап, сексуалдык зомбулук, адамгерчиликсиз мамиле көрсөтүп, карапайым адамдарды негизсиз камаган фактыларды документтештирген.