"Авария эмнеден улам болгону белгисиз"
Борбор Азиядагы энергетикалык шакекчедеги авария эмнеден улам болгону белгисиз. Мындай пикирин Министрлер кабинетинин төрагасы Акылбек Жапаров маалымат жыйында билдирди.
Энергетика министри Доскул Бекмурзаев болгон окуя үчүн кайсы бир тарапты күнөөлөөгө болбой турганын айтты. Ал авария боюнча мамлекеттер аралык комиссия иштей турганын кошумчалады.
Энергетика министрлиги жалпы республика боюнча жарык берилгенин билдирди.
25-январда түшкө маал Кыргызстан, Казакстан жана Өзбекстандын бир катар аймактарында жарык өчкөн.
Ташкентте метро иштебей, уюлдук байланыш үзгүлтүккө учураган. Жалпы Өзбекстан боюнча баардык аэропорттордун иши токтоп калган.
Казакстандын Алматы, Жамбыл жана Түркестан облустарында жарык өчтү.
Борбор Азия энергетикалык шакекчесинде авария болуп, жапырт жарык өчкөн учур биринчи жолу катталып жатат. Бул тууралуу 25-январдагы маалымат жыйында энергетика министри Доскул Бекмурзаев билдирди. Ал авариянын себеби азырынча белгисиз экенин, аны адистер текшерип, анализдеп чыккан соң айтыларын кошумчалады.
Доскул Бекмурзаевдин айтымында, Борбор Азия энергетикалык айлампасындагы аварияны өлкөлөр аралык комиссия иликтейт. Үч өлкөнүн өтүнүчү боюнча (Кыргызстан, Казакстан, Өзбекстан - ред.) комиссия түзүлүп, иш жүрөт.
Брифинг учурунда Министрлер кабинетинин төрагасы Акылбек Жапаров энергосистемадагы кырсык Кыргызстандын аймагында болбогонун айтты.
"Үч-төрт жыл мурдагы кырсыктан кийин биздин энергетиктер даяр экенин көрсөттү. Эки саат ичинде 50 пайызга чейин электр энергиясы менен камсыз болду. Кайсы бир айылдарда жарык жок болсо, сабыр кылып туруңуздар. Энергетиктер кошуп берет. Азыр Энергетика министрлигинин деңгээлинде кошуна өлкөлөр менен сүйлөшүү жүрүп жатат. Тактап туруп бири-бирибиз менен сүйлөшөбүз", - деди Жапаров.
Өкмөт башчы ушу тапта үч өлкө тең бирдиктүү шакекчеден чыгып, ички мүмкүнчүлүктөрүн колдонуп жатканын кошумчалады.