Энергетика министри Доскул Бекмурзаев учурда Токтогул ГЭСинде 9 млрд. 300 млн. куб метрдин тегерегинде суу бар экенин маалымат жыйында билдирди.
Ал Кыргызстан учурда ички энергосистемасын жөнгө салып жатканын айтты.
Бекмурзаев Кыргызстан 2022-2023-жылга карата кышкы даярдыктар быйыл март айынан баштап башталарын кошумчалады.
Министр бардык аймактарга жарык берүү жолго коюлуп жатканын, электрэнергиясынын өчүшүнөн улам келтирилген чыгымдар кийин эсептеле турганын белгиледи.
Мэриянын маалымат кызматы билдиргендей, кээ бир аймактарда, анын ичинде Бишкек шаарында электр энергиясы үзгүлтүккө учураганына байланыштуу “Бишкек жылуулук”, “Бишкексвет”, “Бишкекшаарлифт” , “Бишкек сууканал” ишканалары күчөтүлгөн тартипте иштөөгө өттү. Бул буйрук шаарда жарыкка байланышкан абал турукташканга чейин күчүндө болору айтылды.
Баш калаадагы үйлөрдө лифтте калып калган 40тан ашык киши куткарылды.
Доскул Бекмурзаев: жарык берүү 60% камсыздалды
Энергетика министри Доскул Бекмурзаев Кыргызстан боюнча жарык берүү 60% калыбына келгенин маалымат жыйынында билдирди.
Ал ошондой эле учурда энергетиктер ички абалды жөнгө салуу боюнча бардык аракеттерди көрүп жатканын кошумчалады.