Ош шаарынын чечилбеген таза суу көйгөйү

Ош шаарында 5-августта таңкы саат 5тер чамасында таза суу берүү токтотулуп, түштөн кийин гана суу кайра бериле баштаган. Шаар мэриясы тараткан маалыматка ылайык, Папан суу сактагычына жакын жылгалардан сел жүргөн. Анын кесепетинен Ак-Буура дарыясындагы суунун ылайланышы нормадан жогору болгондуктан Ош шаарынын Юго-Восток, ХБК, Туран кичи райондоруна жана Достук, Калинин массивдеринен башка аймактарына таза суу берүү убактылуу токтотулган. 5-августта бир күн кечке суу жок калган экинчи борбордогу абалды Оштогу кесиптешим Марат Акимбек уулу кенен айтып берет.