Кыргызстанда муфтийдин кызматтан кетиши бул ирет да чыр менен коштолду. Учурда муфтийлик кызматка талапкерлердин арызы кабыл алына баштады. Муфтиятта чырлуу окуялар кайталанбашы үчүн кандай өзгөрүүлөр керек? Дегеле дин чөйрөсүндөгү азыркы абал кандай? Ислам интеллигенциясы канткенде калыптанат? Ушул жана башка суроолорду “Азаттыктын” “Эксперттер талдайт” программасында талкуулаганы турабыз. Биздин программабызга Муфтияттын Борбордук текшерүү комиссиясынын мүчөсү Бакыт Нурдинов, Аалымдар кеңешинин мүчөсү, Ислам университетинин проректору Марс Ибраев, Дин иштери боюнча мамлекеттик комиссиясын бөлүм башчысы Кубанычбек Абакиров, дин таануучу Эсен Өмүракунов жана Түркиядагы Эржийес университетинин докторанты, дин таануучу Элмурат Кочкор уулу катышат.