Аянтка митингге чогулган элди күч түзүмдөрү көздөн жаш агызуучу газ, желим ок, катуу үндүү граната, суу чачып таркатууда. Акциянын катышуучулары Жогорку Кеңеш менен президенттик администрациянын имаратынын тосмосунан секирип кирүүгө аракет кылышкан. Милиция, ОМОН кызматкерлери митингдегилерди экиге бөлүп, атайын автоунаа жана иттердин жардамы менен кубалоодо.
«Азаттык» радиосунун кабарчыларынын түз эфиринен айрым жарадар болгон атуулдарды да көрсө болот. Митингчилер атылган октон жана түтүндөн улам тарап жатат.
Бишкектеги Ала-Тоо аянтындагы митингди таратууда “Ата Мекен” партиясынан талапкер, депутат Жанар Акаев жараат алды. Бул тууралуу Акаевдин жардамчысы Орозбек Муратов кабарлады. Анын айтымында, бутунан жараат алган Акаевди ооруканага жеткирүү үчүн "Тез жардамды" күтүп жатышат. Интернетте тараган видеодо Акаевди бир нече адам көтөрүп баратканын көрүүгө болот.
"Азаттыктын" кабарчысынын маалыматы боюнча, бери дегенде эки адам жараат алып, аларга "Тез жардам" кызматкерлери жеринде жардам көрсөтүүдө.