Аянтка митингге чогулган элди күч түзүмдөрү көздөн жаш агызуучу газ, желим ок, катуу үндүү граната, суу чачып таркатууда.
Митингчилер күч кызматкерлерине таш ыргытууда. Күч кызматкерлери желим ок атып жатышат.
Караколдун борбордук аянтында эл чогула баштады. Бул тууралуу Каракол шаарынын активисти Замира Оторбаева билдирди. Анын айтымында, өкмөттүн Ысык-Көлдөгү өкүлчүлүгүнүн маңдайында эл чогулууда. Алар шайлоонун жыйынтыгына болбогонун билдиришти. Ошондой эле облустагы айрым айылдардын тургундары да Бишкектеги митингге катышуу үчүн жолго чыкканы белгилүү болду. 4-октябрда өткөн парламенттик шайлоодо Ысык-Көл облусунун 51,8% добуш берген.
Саламаттык сактоо министрлигинин басма сөз катчысы Жылдыз Айгерчинова «Азаттыкка» Ала-Тоо аянтында митингге чыккандарды таркатуу маалында күч түзүмдөрүнүн эки кызматкери жарадар болгонун кабарлады. Экөөнүн тең мээси чайкалган. Аларды «Тез жардам» кызматы Улуттук госпиталга алып кетти.
Азыркы тапта аянтта бир «Тез жардам» бригадасы иштеп жатат. Митингге келгендердин арасынан канчоо жарадар болгону белгисиз.
Буга чейин Бишкектеги Ала-Тоо аянтындагы митингди таратууда «Ата Мекен» партиясынын талапкери, депутат Жанарбек Акаев жараат алганын анын жардамчысы Орозбек Муратов билдирген эле.
«Азаттыктын» аянттагы кабарчылары буга чейин эки катышуучу жарадар болгонун көргөнүн түз эфирден айтышты. Аянтка чогулган элди күч түзүмдөрү көздөн жаш агызуучу газ, желим ок, катуу үндүү граната, суу чачып таркатты.