«Социал-демократтар» партиясы 4-октябрдагы парламенттик шайлоонун жыйынтыгына нааразылыгын билдирип, 5-октябрда Жогорку Кеңеш менен президенттик администрациянын имаратынын алдына митингге чыкты.
Анда партия мүчөсү Ирина Карамушкина сүйлөп, «бийлик шайлоону өзү каалагандай өткөрдү» деп белгиледи. Ал бийликтин өзүм билемдигине оппозициянын алсыздыгы, чачкындыгы себеп болгонун айтты:
«Кечээ биз көрдүк, алар өздөрү каалагандай жыйынтыктын сүрөтүн тартышты. Мектептердеги мугалимдерди мажбурлашты. Өлкөнү бандиттерге жана аткезчилерге ишенип тапшыра албайбыз».
Ак үйдүн жанында шайлоонун жыйынтыгына каршы нааразылык акциясына чыккандардын арасында пикир келишпестик чыкты. "Социал-демократтар" партиясы өткөрө баштаган акцияга бир нече адам келип, аларды кетирүүгө аракет кылышты.
