Парламенттик шайлоонун жыйынтыгына нааразы болгондордун митингине келген кыз "Азаттыктын" кабарчысына сүйлөп жатып, көзүнө жаш алды. Ал "пикеткөй эмес, китепкөй Ала-Тоо бололу деп үмүттөнгөнүн" айтты.
Бишкектин Ала-Тоо аянтында шайлоонун жыйынтыгын жокко чыгарууну талап кылып жаткан митингде кайрадан чуу чыкты.
Трибунада "Мекен ынтымагы" партиясынын лидери Темирбек Асанбеков сүйлөп жатканда "Чоң казат" партиясынын өкүлү Сыймык Жапыкеев микрофонду тартып алууга аракет кылды. Ортодо кайым айтышуу чыгып, ага сөз берилген жок.
Бир нече убакыттан кийин Жапыкеев кайрадан сөз алып, акцияны токтотпоого чакырды.
Бүгүнкү митинг алгач Жогорку Кеңештин жана президенттик аппараттын кеңсесинин алдында башталган. Апрель ыңкылабынын курмандыктарына коюлган эстеликтин жанында "Социал-демократтардын" өкүлдөрү сүйлөп, шайлоонун жыйынтыгын сындап жатканда "апрелчилербиз" деген топ келип, тоскоолдук жаратышкан. Ушундан улам "социал-демократтар" борбордук аянтта өтүп жаткан башка партиялардын нааразылык акциясына кошулушкан.
Азыр митинг уланууда. Аянттан жүздөгөн адамдарды көрүүгө болот.
Трибунада сүйлөгөндөр шайлоо өнөктүгү маалында да ар кандай чагымдар болгонун белгилеп, бирин бири ынтымакка чакырууда.
Трибунага чыгып сүйлөп жаткандардын арасынан «Социал-демократтар», «Мекен Ынтымагы», «Чоң Казат», «Реформа», «Бир Бол» партияларынын өкүлдөрүн көрүүгө болот. Бул партиялардын өкүлдөрү митингде шайлоо тыянагына каршы бириккенин митингдин башталышында дагы бир жолу жарыялашкан. Алар башка партияларды да өздөрүнө кошулууга чакырышты.
Митингде «Президент кетсин», «Матраимов камалсын», «Биримдик» кетсин» деген ураандар айтылды.
«Мекенчил» партиясы бүгүн, 5-октябрда билдирүү таратып, учурда Ала-Тоо аянтында партиянын атынан сүйлөп жаткан Мелис Аспековдун партияга эч кандай тиешеси жок экенин жана ага партиянын атынан сүйлөө укугу берилбегенин маалымдады.
«Мекенчил» саясий партиясынын басма сөз катчысы Нургазы Анаркуловдун маалыматына караганда, 4-октябрдагы парламенттик шайлоонун расмий жыйынтыгы чыкмайынча, партия кандайдыр бир кадамдарды таштабайт.
«Парламенттик жарыштын жыйынтыгы толук чыга элек. Бардык участкалардагы добуштар эсептелип, бюллетендерди кол менен саноо процесси аяктап, жарыштын толук жыйынтыгы чыкмайынча биз комментарий бере албайбыз. Ал эми Аспековдун сөздөрүн чагым катары караш керек. Анын биздин партияга тиешеси жок, «Мекенчилдин» атынан мындай чечимдер тууралуу бир гана лидерибиз Камчыбек Ташиев жасай алат».
Нургазы Анаркулов партиянын тарапкерлерин сабырдуулукка чакырып, чагымга алдырбоого үндөдү.
4-октябрда өткөн парламенттик шайлоонун баштапкы жыйынтыгы боюнча «Мекенчил» саясий партиясы добуштардын 6,8% алган.