Кыргызстанда парламенттик шайлоого катышкан дагы бир нече саясий партия биригип, бул жараянды мыйзамсыз деп табууну чогуу талап кылмай болушту. 5-октябрда "Реформа", "Мекен Ынтымагы", "Чоң Казат", "Ыйман нуру" жана "Ордо" партиялары бириккенин жарыялашты. Алар Бишкектин борбордук аянтында нааразылык акциясына чыгарын билдиришти.
“Мекен ынтымагынын” лидери Темирбек Асанбеков өз сөзүндө “Эгерде бул багыт менен кете берсек Кыргызстандын келечеги болбойт. Ошондуктан баарыбыз биригип, шайлоонун жыйынтыгын жокко чыгарууну талап кылабыз” деп айтты.
"Бир Бол" партиясынан Жогорку Кеңешке талапкер болгон, активист Руслан Акматбек бүгүнкү күндө парламентти эле эмес, келечекке болгон үмүтүбүздү алдырып жибердик деди. Ал бул тууралуу 5-октябрдагы шайлоонунун жыйынтыгына нааразы болгондордун митингинде билдирди.