Ички иштер министринин орун басары Алмаз Орозалиев күч кызматкерлери эски аянттын жанында токтоочу жайда жөн эле турушканын айтты.
12 саясий партия Борбордук шайлоо комиссиясынан 4-октябрдагы шайлоону жокко чыгаруусун талап кылган катка кол коюшту. Бул тууралуу Ала-Тоо аянтында өтүп жаткан митингде «Республика» партиясынын лидери Мирлан Жээнчороев билдирди. Жээнчороевдин айтымында, кол койгондордун арасында «Мекенчил» партиясы жана «жети пайыздык чектен өткөнү" белгилүү болгон «Бүтүн Кыргызстан» партиясы да бар»
«Үч ууру партиядан тышкары бардык партиялар кол койду, шайлоо жокко чыксын, бандиттер менен уурулар кетсин деп», - деди саясатчы.
«Республика» партиясынын талапкери Кенжебек Бокоев 5-октябрда Талас шаарында өткөн тынчтык митингдин катышуучулары Бишкекке жол тартканын «Азаттыкка» билдирди.
«Бүгүнкү митингге жүздөгөн кайдыгер эмес таластыктар келди. Анда шайлоону тааныбайбыз деген резолюция кабыл алдык», - деди ал.