"Ата Мекен", "Бир Бол", "Республика", "Замандаш" партиялары шайлоонун жыйынтыгын тааныбай турганын айтып. Ч.Айтматов атындагы Опера жана балет театрынын алдында тарапташтары менен тынчтык митингин өткөрүшүүдө.
Парламенттик шайлоонун натыйжасын тааныбоо талабы менен уюштурулган митинг жыйынтык чыкмайынча улана берет. Бул тууралуу "Азаттык" радиосуна Бишкектин Ала-Тоо аянтында өтүп жаткан митингдин уюштуруучуларынын бири, "Реформа" партиясынын өкүлү Азият Жекшеев билдирди:
"Шайлоо жапырт мыйзам бузуу, элди коркутуп-үркүтүү менен өттү. Парламентке уурулар менен паракорлор, алтынчы чакырылыш (Жогорку Кеңеш-ред.) кайра келип отуруп алды. Биз жаңыланууну көздөп шайлоого чыкканбыз. Бүгүн бул жерде элдин арасынан чыккан партиялар чогулуп жатат. Биригип, резолюцияга кол койгон партиялар эми аягына чейин барышат. Жыйынтык чыкмайын мөөнөтсүз митинг улана берет".
«Мекенчил» партиясы бүгүн, 5-октябрда билдирүү таратып, учурда Ала-Тоо аянтында партиянын атынан сүйлөп жаткан Мелис Аспековдун партияга эч кандай тиешеси жок экенин жана ага партиянын атынан сүйлөө укугу берилбегенин маалымдады.
«Мекенчил» саясий партиясынын басма сөз катчысы Нургазы Анаркуловдун маалыматына караганда, 4-октябрдагы парламенттик шайлоонун расмий жыйынтыгы чыкмайынча, партия кандайдыр бир кадамдарды таштабайт.
«Парламенттик жарыштын жыйынтыгы толук чыга элек. Бардык участкалардагы добуштар эсептелип, бюллетендерди кол менен саноо процесси аяктап, жарыштын толук жыйынтыгы чыкмайынча биз комментарий бере албайбыз. Ал эми Аспековдун сөздөрүн чагым катары караш керек. Анын биздин партияга тиешеси жок, «Мекенчилдин» атынан мындай чечимдер тууралуу бир гана лидерибиз Камчыбек Ташиев жасай алат».
Нургазы Анаркулов партиянын тарапкерлерин сабырдуулукка чакырып, чагымга алдырбоого үндөдү.
4-октябрда өткөн парламенттик шайлоонун баштапкы жыйынтыгы боюнча «Мекенчил» саясий партиясы добуштардын 6,8% алган.