Жогорку Кеңеш Алмазбек Атамбаевди экс-президент деген статустан ажыратты. Башкы прокуратура Атамбаев өлкөнү башкарып турган мезгилде бир нече мыйзам бузган деп, кылмыш ишин козгоого уруксат алды. Мурдагы президент жана анын тарапкерлери бул аракетти саясий куугунтук катары санап, Атамбаевдин Кой-Таштагы үйүндө штаб түздү. Постсоветтик чөлкөмдө биринчи жолу парламент тарабынан экс-президентти кол тийбестиктен ажыратуу Кыргызстандагы коомдук-саясий абалга кандай таасирин тийгизет? "Эксперттер талдайт" талкуусуна Жогорку Кеңештин мурдагы төрагасы, депутат Чыныбай Турсунбеков, парламент депутаттары Акылбек Жапаров, Анвар Артыков, жарандык активист Динара Ошурахунова жана БШКнын мурдагы төрагасы Акылбек Сариев катышты.