Коом көйгөйү балдар тасмасында

Бишкекте 15-ноябрда балдардын "Карек" кинофестивалы жыйынтыкталып, жеңишке жеткен тасмаларга сыйлыктар тапшырылды. Жакшы деп табылган тасмалардын алдыңкы сабында мыкты окугандыгы үчүн тартипсиз балдар арасында кысымга кабылган окуучу, балдардын тагдырын талкалаган жол кырсыктары, балалык сүйүү тууралуу баяндар жана коомчулуктан кичинекей демократияны сактап калууну өтүнгөн тасма бар. Адистер өспүрүмдөр тандаган темалар бүгүнкү жаш муундун актуалдуу маселелерин ачык-айкын баяндап бергени менен маанилүү экенин белгилешти. Аталган кароо-сынак быйыл экинчи жолу өтүп жатат. Ага 7 жаштан 17 жашка чейинки кино тартууга кызыккан окуучулар катыша алат.