Эшенкулов: Көчүрүп кеткидей мөңгү боз үй эмес

"Центерра" Кумтөрдөгү Давыдов жана Лысый мөңгүлөрүнүн астындагы алтынды ачык жол менен казып алыш үчүн андагы муз массасын бузууга уруксат алууну көздөп жатат. Мындай оюн "Азаттыкка" билдирген илимпоз-окумуштуу, физикалык география боюнча адис Темиркул Эшенкулов өкмөттүн "ал эки мөңгүнүн теңинен көбү буга чейин эле эрип жок болгон" деген жүйөсү ишеним жаратпай турганын айтууда. Окумуштуу күндүн кескин ысып кетишинен улам мөңгүнүн эриши анын расмий маалыматта айтылгандай "укмуштуудай тездик менен жоголушуна" алып келбесин белгилеп, илимий көз карашы менен бөлүштү. Өкмөттүн маалыматы боюнча, өткөн 25 жылда Давыдов жана Лысый мөңгүлөрүнүн аянты 720 миллион куб метрден, 400 миллион куб метрге чейин азайган. "Центерра" компаниясы муну дүйнөдө күндүн табы ысып жатканы менен байланыштырган.