Жогорку Кеңештин эл аралык иштер боюнча комитети Кыргызстандын бирдиктүү экономикалык аймакка кирүү боюнча жол картасын жактырды. Бул тууралуу экономика министри Темир Сариев “Азаттыкка” билдирди. Анын айтымында, бул жол карта өлкөнүн аталган мейкиндикке кошулуу жараянынын жол-жобосун камтыйт. Анда аймакка кирген Орусия, Беларус жана Казакстан менен эркин соода жүгүртүү, миграциялык кызматташтык жүргүзүү эрежелери каралган. Бирдиктүү экономикалык аймак бул - Бажы биримдигинен кийинки уюшма болуп саналат.